ვირუსული ინფექციის გართულებით სიღნაღში 13 წლის გოგონა, ანა კიკილაშვილი გარდაიცვალა. ბ
მომხდარ ტრაგედიაზე Ambebi.ge-ს სოფელ ჯუგაანის საჯარო სკოლის დირექტორი მარიამ ბოლაშვილი ესაუბრა:
,,ანა კიკილაშვილი ჩვენი სკოლის მეშვიდე კლასის მოსწავლეა. ძალიან კარგი მოსწავლე, ძალიან კარგი მეგობარი, კარგი ადამიანი იყო. უნაკლო ბავშვი იყო. ძალიან მძიმე ფაქტი მოხდა და განვიცდით ყველანი. ანა დედისერთაა და სოფელში მშობლებთან ერთად, ბედნიერად ცხოვრობდა. სკოლაში დადიოდა ჩვეულებრივ, ახლა ეს კვირა არდადეგები გვქონდა, მაგრამ სანამ არდადეგები დაიწყებოდა, მანამდე ესწრებოდა გაკვეთილებს.
8 მარტს ბავშვები შეიკრიბნენ და იქ იყო ჩვენი ლამაზი ანაც, ძალიან აქტიურობდა, ძალიან კარგ ხასიათზე იყო, ერთობოდა თანატოლებთან ერთად. ამას ვინ წარმოიდგენდა?! შეგვძრა ამ საშინელმა ამბავმა. ბავშვს გრიპის ვირუსი ჰქონდა. დღეს ჩვენი სოფლის ოჯახის ექიმსაც ვესაუბრე. ის ამბობს, რომ გოგონა დედამ მიუყვანა კლინიკაში. ექიმმა გასინჯა ბავშვი და რადგან ის მუცელს იტკივებდა, დედას უთხრა, რომ ბავშვი წაეყვანა “არქიმედეს” კლინიკაში.
ექიმი ამბობს, ფილტვებზე მოსმენით არაფერი პრობლემა არ ჩანდა, მაგრამ რადგან მუცელი სტკიოდა, ვუთხარი, რომ აუცილებლად კლინიკაში წაეყვანაო. ბავშვს უარი უთქვამს დედისთვის და სახლში წასულან. ძალიან ყურადღებიანია ჩვენი სოფლის ექიმი და მას მალევე მოუკითხავს ბავშვი. დედას უთქვამს, არ მოგვყვებაო, ექიმს ისევ უთქვამს, რომ სასწრაფოდ წაეყვანა კლინიკაში, ამასობაში უკვე ძალიან დამძიმდა ბავშვის მდგომარეობა. ოჯახის ექიმთან რომ იყო, იქიდან 3 საათში ბავშვი ისე დამძიმდა, რომ სასწრაფოს გამოძახება გახდა საჭირო და უკვე ძალიან ცუდად იყო ბავშვი. არადა სამი საათით ადრე, შუა დღით მოიყვანეს თავისი ფეხით ოჯახის ექიმთან და მუცელს რომ იტკივებდა, ამიტომ ცენტრალურ კლინიკაში გადავამისამართეო.
ვიზუალურად ასეთი დამძიმებული არ იყოო. არც დიდი ხანი არ ჰქონდა ეს ვირუსი, როგორც ჩანს. 8 მარტს ბავშვი ძალიან კარგად იყო, თანატოლებთან ერთად ერთობოდა და ალბათ, ორი დღე იყო ცუდად. სამწუხაროდ, ძალიან სწრაფად მოხდა ეს ყველაფერი. ოჯახის ექიმიდან რომ წამოვიდა. სადღაც 3 საათში ისე დამძიმდა, რომ წნევას ვეღარ იჭერდნენ, უვარდებოდა.
“არქიმედეში” რომ შეხედეს, უკვე ძალიან მძიმედ იყო გოგონა, ექიმი ცდილობდა როგორმე წნევა შეენარჩუნებინა ბავშვისთვის და სასწრაფოდ გადაიყვანეს თბილისში, კლინიკაში, მაგრამ სამწუხაროდ, ბავშვი გარდაიცვალა, ვერ გადაარჩინეს. იმავე დღეს გარდაიცვალა. სასწრაფოს ექიმს რომ ველაპარაკე, მითხრა, აქედან რომ გადავიყვანეთ უმძიმესი იყოო, უკვირს ყველას, ასე სწრაფად რა მოხდა. მაღალი ტემპერატურა ჰქონდა და იმ 3 საათში ფაღარათი და ღებინება დაეწყო, დამძიმდა და გარდაიცვალა. ძალიან განვიცდით ამ ტრაგედიას ყველანი. ისეთი ლამაზი ბავშვი იყო სულ მისი ყურება გინდოდა. მშობლები განადგურდნენ, ერთადერთი შვილი აღარ ჰყავთ.
ახლა მოვედი სამძიმრიდან და განადგურებული ვარ. ღორის გრიპი აღმოჩნდა ეს ვირუსი, რამაც 13 წლის მოზარდის სიცოცხლე იმსხვერპლა. არადა ბავშვი სრულიად ჯანმრთელი იყო და არანაირი ქრონიკული დაავადება მას არ ჰქონდა. გლოვობს მთელი სოფელი, უნდა გენახათ დღეს რა ხდებოდა ჩვენს სკოლაში. 200 ბავშვი იყო და მთელ სკოლაში ბავშვების ხმა არ ისმოდა, მერხთან ისხდნენ დაღონებულები და დადუმებულები. ვერც იფიქრებდი, რომ სკოლაში ამდენი ბავშვი იყო. ძალიან უჭირთ ანას კლასელებსაც, მთელ სკოლას და მთელ სოფელს, რაიონს სტკივა ეს დიდი ტრაგედია. ძალიან გვტკივა გული, მართლა გამორჩეული გოგონა იყო ანა. ვუსამძიმრებ მის ოჯახს. ძალიან განვიცდით, დედას ერთადერთი შვილი აღარ ჰყავს”, – ამბობს სოფელ ჯუგაანის საჯარო სკოლის დირექტორი მარიამ ბოლაშვილი.
წყარო: ambebi.ge
