სალი, 18 წლის: “გული ძალიან მტკივა და არ ვიცი, ამ ტკივილს რა მოვუხერხო… ბევრი მეგობარი მყავს, მაგრამ მათთან ბოლომდე გულახდილი არ ვარ. რატომ? არ ვიცი, დაქალებს როგორ ავუხსნა, რომ ადამიანი, რომელიც სიგიჟემდე მიყვარდა, რომლითაც ასე ვტრაბახობდი და რომლის გამოც მეგობრებისთვის დროს ხშირად ვერ ვპოულობდი, მატყუარა აღმოჩნდა.
მას ჩემგან მხოლოდ ის უნდოდა, რაც შტერი ქალებისგან სურთ მექალთანე კაცებს. მადლობა ღმერთს, სიმართლე დროზე გავიგე და ისეთი შეცდომა არ დავუშვი, რომელიც ცხოვრებას დამინგრევდა, მაგრამ ამ გულის ტკენას რით ვუწამლო?..
გიო ვაკის პარკში, დაახლოებით 1 წლის წინ გავიცანი. ის პატარა ბიჭს ასეირნებდა, მე კი ჩემი ცუგა მყავდა წაყვანილი სუფთა ჰაერის ჩასაყლაპად.
გიო გამომელაპარაკა: ჯერ ჩემს ცუგაზე ვილაპარაკეთ, მერე ბავშვს მივეფერე და ვკითხე, – თქვენი შვილია-მეთქი? – არა, ჩემი ძმიშვილიაო. ცოტა ხანში ბავშვმა დაუძახა, – მამაო. ელდა მეცა, რადგან გიო დანახვისთანავე მომეწონა.
მიხვდა, რომ რაღაც მეწყინა და თავი იმართლა: ჩემი ძმიშვილი ზოგჯერ მამასაც მეძახის. ერთ ოჯახში რომ ვართ, ბავშვს გაორება დაემართა და ვეღარ არჩევს, ვინ მამაა და ვინ – ბიძა. თანაც, მე უფრო ხშირად მხედავს, ვიდრე მამამისსო. ეს ამბავი დავიჯერე…
იმ დღეს ჩვენ ტელეფონის ნომრები გავცვალეთ. რამდენიმე კვირის განმავლობაში მხოლოდ ვმესიჯობდით, მერე კი პაემანი დამინიშნა. შევხვდი. ერთმანეთი შეგვიყვარდა. ყოველ შემთხვევაში, მე მასზე გაგიჟებული ვიყავი…
ის მეგობრებსაც გავაცანი. ყველას მოეწონა. შემეშინდა, მისი თავი ჩემთვის ვინმეს არ “აეხია” (ვაღიარებ, მაშინ შევცდი, დაქალებზე უსაფუძვლოდ რომ ვიეჭვიანე), ჰოდა, მას მერე გიოს არავის ვაკარებდი.
ის კი არა, დაქალებთან შესახვედრად თავადაც იშვიათად ვიცლიდი და მაშინაც გოგონებს ჩემი “ლოვეთი” “ვუბურღავდი” ტვინს. ჰოდა, ამიტომაც მიჭირს მათთან სიმართლის თქმა. ალბათ, ჩემს გასაჭირს გულთან არც კი მიიტანენ…
როგორ გავიგე, რომ მატყუებდა? ცოტა ხნის წინ მისმა მეუღლემ დამირეკა და მითხრა: რატომ მინგრევ ოჯახს? კარგი, ვთქვათ, ჩემი ბედი არ გაღელვებს, მაგრამ ბავშვებმა რა დაგიშავეს? 3 ბავშვს მამას რატომ ართმევო?..
ჯერ მეგონა, ნომერი შეეშალა, მაგრამ მერე დავრწმუნდი, რომ გიოზე მელაპარაკებოდა. ჩვენ ერთმანეთს დავშორდით და მისი დანახვა კი არა, ხმის გაგონებაც არ მინდა.
ცდილობდა, ჩემთვის რაღაც აეხსნა, მაგრამ მე აღარაფერი მაინტერესებს. მხოლოდ ის მინდა, მეგობრები, მათი ნდობა დავიბრუნო და ეს ერთი წელი, რომელიც გიოსთან ერთად გავატარე, გულიდან ამოვიგლიჯო…”
გთხოვთ მოიწონეთ და გააზიარეთ სტატია.. ასევე გაგვიზიარეთ თქვენი აზრი კომენტარებში..
ყურადღება: ფოტო პირობითია
ჟურნალი “გზა”
