ნანუკა ჟორჟოლიანმა ვიკა ბუკიას გადაცემაში “ფილტრის გარეშე” ბევრ თემაზე ისაუბრა, მათ შორის მოჰყვა, როგორ გადაარჩინეს სიკვდილს იმჟამად ტელეკომპანია “მაესტროს” თანამშრომელი ბაია გადაბაძე. ამ თემას სოციალურ ქსელში ეხმიანება ბაია და წერს:
„ვნახე ნანუკა ჟორჟოლიანი ინტერვიუ ვიკა ბუკიასთან, თუ ოდესმე ვინმეს ეჭვი შეჰპარვია, აკეთებდა თუ არა ნანუკა ჟორჟოლიანი კეთილს საქმეებს 2012 წლამდე, მათ მინდა ვუთხრა, რომ კი, აკეთებდა!
მე ვარ ის ადამიანი, ვისაც ნანუკამ პირდაპირი მნიშვნელობით სიცოცხლე აჩუქა, მან და გიგი უგულავამ. იქ კიდევ ბევრი ადამიანი მონაწილეობდა, რისთვისაც უზომოდ მადლიერი ვარ . ამ ადამიანებს შორის აუცილებლად მინდა გამოვყო გიორგი ისაკაძე, რომელსაც იმ დროს არ ვიცნობდი, ისევე როგორც ნანუკას, გიგის და კიდევ ბევრ სხვას.
მე მაშინ ვიყავი ტელეკომპანია “მაესტროს” პროდიუსერი, რომელიც ძალიან დიდ წინააღმდეგობას უწევდა “ნაციონალურ მოძრაობას”. ზოგადად, ჩემი ცხოვრების დიდი ნაწილი “ნაციონალურ მოძრაობასთან” იდეოლოგიურ და ფიზიკურ ბრძოლაში გავატარე. ფიზიკურში ვგულისხმობ იმას, რომ ვისაც ახლა არ ახსოვს და, ზოგადად, მახსოვრობის პრობლემა ნამდვილად დგას ქვეყანაში, 2009 წლის 25 მაისს, ღამის 3 საათზე ბომბი ისროლეს “მაესტროს” კართან და მე ვიდექი იმ კარის უკან. მაშინ ღმერთმა გადამარჩინა. მეორეჯერაც გადავრჩი, იმავე წლის 25 ივნისს გადატანილი ოპერაციის შედეგად დამეწყო პერიტონიტი. გადარჩენის შანსი იყო ძალიან მცირე, მაგრამ ღმერთმა მაშინაც გადაწყვიტა, რომ უნდა მეცოცხლა და გამომიგზავნა ჩემი მეგობრები, ნანუკა, გიგი, გიორგი.
ჩემი გადარჩენის ოპერაციას ხელმძღვანელობდა ნათია გამცემლიძე და რომ არა მისი თავდადება, შეიძლება ამ ადამიანებს ვერც გაეგოთ, რომ შველა მჭირდებოდა. ნათია ჩემთვის არავის ცოლისდა არ არის, არც მაშინ ყოფილა. ნათია უბრალოდ ძალიან დიდი გულის ადამიანია და ჩემი მეგობარი, რომლითაც ვამაყობ და ბედნიერი ვარ, რომ მყავს.ამ ხალხთან ერთად, უსამართლობა იქნება არ ვახსენო – გია და ლევან გაჩეჩილაძეები, რომლებმაც ასევე ყველაფერი გააკეთეს, რაც შეეძლოთ და არ შეეძლოთ ჩემს გადასარჩენად.
რომ დავუბრუნდეთ მთავარ თემას, რატომ აღვნიშნე, რომ ბომბი შემომიგდეს?! ამით მინდოდა ხაზი გამესვა დაპირისპირების მასშტაბისთვის. ნანუკამ და გიგი უგულავამ მე მაჩუქეს სიცოცხლე პირდაპირი მნიშვნელობით და არასოდეს, არასოდეს არ მიუნიშნებიათ, რომ მხარი დამეჭირა “ნაც. მოძრაობისთვის” ან რაიმე ირიბად მაინც მეთქვა კარგი მათზე, პარტიაზე ან ვინმეზე… ვინც ამ პოსტს წაიკითხავს მათ შორის ისეთებიც იქნებიან, ვინც იტყვის, რომ ამ ნაბიჯით მათ ისედაც დაიწერეს ქულებიო – ეს ჩემთვისაც პირადად ბევრს უთქვამს. მე ასე ნამდვილად არ ვფიქრობ, მაგრამ თუ მაინც ასე იყო და ვცდები, ღმერთმა ყველა ქულა შეარგოს და გაუორმაგოს, რადგან პირადად ვერაფრით გადავუხადე სამაგიერო და იმედია, არც არასოდეს დასჭირდებათ. ნეტავ ყველამ ჩაიწეროს ბევრი ქულა და აკეთოს სიკეთე.
რაც შეეხება ნანუკას, მას მერე რაც გამოვჯანმრთელდი, დავმეგობრდით. მას ძალიან ბევრი სიკეთე აქვს გაკეთებული, მათ შორის 2012 წლამდე ჩემს თვალწინ და მისთვის უცნობი ადამიანებისათვის, უსაზღვროდ კეთილი ადამიანია.
სამართლიანად ჩათვალე, ჩემო ნანუკა, რომ ჩემი მხარდაჭერის მოლოდინი გქონდა, რამაც დაიგვიანა. ძალიან ვწუხვარ! მხარდაჭერას შეხსენება არ უნდა სჭირდებოდეს, მაგრამ ყველას გვეშლება. ალბათ, ადრეც შემშლია და არ გამოვრიცხავ, მომავალშიც შემეშალოს, თუმცა, აღიარებაც არ მიჭირს.
სულ ეს იყო, რისი თქმაც მსურდა. თუმცა , ყველაფერი ვერ ჩავატიე, ვერც ყველა ვახსენე, მაგრამ ეს პოსტი ნანუკაზეა!
მადლობელი ვარ შენი და ჩემი დიდი სიყვარული, პატივისცემა და მხარდაჭერა შენ ამ რთულ დროს!
პ.ს. ამ პოსტს კომენტარებს ვუთიშავ – არ მინდა ჩემი სივრცე გახდეს ბრძოლის და ლანძღვის ველი, რაც ასე გაბატონებულია ამ ქვეყანაში. ამას ჩემს გარეშეც შეძლებთ”.
