ჟურნალისტი ანა მარშანია საყურადღებო და აქტუალურ თემაზე ავრცელებს პოსტს, რომელიც ალბათ ბევრისთვის იქნება საინტერესო:
“ზუსტად ვხვდები, შშმ შვილის განვითარებასა და ჯანმრთელობასთან დაკავშირებული სირთულეები, ისე არ აწუხებს მშობელს, როგორც გაავებული საზოგადოება, რომელთან ერთადაც მათ თანაცხოვრება უწევთ.
ვერიდები ხოლმე ასეთი ამბების აფიშირებას, მაგრამ დღევანდელმა ამბავმა მომცელა.
ავტობუსში გვერდით მომიჯდა 4 წლის ბიჭი, რომელიც ღუღუნებდა. ხო, ზუსტად ეს სიტყვა შეეფერება, მტრედივით დაბალ ხმაზე ტკბილად ღუღუნებდა. დედამისმა რამდენჯერმე პირზე ააფარა ხელი და სთხოვა, გაჩუმებულიყო. ვიგრძენი, რომ ეს ქალი საზოგადოებისგან მაგარი შეშინებული და დაკომპლექსებული იყო.
ამ დროს, ბავშვმა ოდნავ ბოტასი მომადო და კაბა მსუბუქად დამესვარა. დედამისი გიჟივით მომვარდა და ვერც მოვასწარი შეკავება, ისე სწრაფად, კაბის გაწმენდა დამიწყო.
სასწრაფოდ გავაჩერე და ვუთხარი, რომ მეც მყავს ბავშვები და შემთხვევით ისინიც აბიჯებენ ხალხს. მერე, ვთხოვე, ნუ აჩუმებდა პატარას და ვაგრძნობინე, რომ არ მაწუხებდა. მითხრა, რომ ეს არის მისი “ლაპარაკი” და სახლში ნაკლებად, გარეთ გამოსვლისას კი, უფრო “ლაპარაკობსო”.
მეუბნება, როგორ არ გავაჩუმო, იცით, ცოტა ხნის წინ, ზუსტად ავტობუსში, ქალმა მითხრა, ნწ, ნწ, ოჯახისთვის როგორი სასჯელია ასეთი ბავშვის ყოლაო და რა თქმა უნდა, ამას რომ მიყვებოდა, ცრემლები წამოუვიდა…
ნუ, მერე კიდევ ვილაპარაკეთ და როცა ვემშვიდობებოდი, მითხრა, ნეტავ, ამ ქვეყანაზე ბევრი იყოს თქვენნაირი შეგნების მქონეო… არადა, რაზე ვსაუბრობთ? ისე გადაგივლიან და გადაგჯეგავენ, ბოდიშსაც არავინ მოგიხდის.
ღუღუნი კი არა, ტელეფონზე ულიმიტოდ, საათობით, ისე ხმამაღლა ლაპარაკობენ, აზრადაც არ მოუვათ, რომ უტაქტობაა და ხალხი წუხდება… რა შეგნებაზეა, რა სასჯელზეა, რა განვითარებაზეა ლაპარაკი?
ჩამოვედი ავტობუსიდან და დავტოვე ოთხი წლის ბიჭუნა, რომელიც ფანჯარაში იყურებოდა და ზუსტად, ზუსტად მტრედივით ტკბილად ღუღუნებდა, დედამისი კი შეშინებული იდგა, მორიგი ავი მგზავრისა და მძღოლის შენიშვნის მოლოდინში.
გამძლეობა და ყველაზე კარგად ყოფნა ამ პატარებს და მათ მშობლებს. ჩვენ კიდევ, მეტი შეგნება, სიყვარული და მიმღებლობა არ გვაწყენდა”.
გთხოვთ მოიწონეთ და გააზიარეთ სტატია.. ასევე გაგვიზაირეთ თქვენი აზრი კომენტარებში..
ყურადღება: ფოტო პირობითია
