იმ შემთხვევაში თუ ავსტრალიის ამ მზისგან გახურებულ დაბლობებზე მოხვდებით, სადაც ხეები და მცენარეები თითქმის ვერ ხარობს, ტერიტორია სრულიად დაუსახლებელი მოგეჩვენებათ, თუმცა სინამდვილეში, მიწისზედა ხრიოკის ქვეშ ხალხი ბიბინებს და ცხოვრება ჩქეფს.
ამ მიწისქვეშა ქალაქის დაარსება 1915 წლიდან დაიწყო, მას შემდეგ რაც ოქროს მაძიებელმა მამა-შვილმა წერაქვი სწორედ ამ ადგილზე დაარტყა და მიწის თხრა დაიწყო.
ოქროს მაძიებლები ძალიან მალე მიხვდნენ, რომ ამ ადგილებში ოქრო არ იყო, თუმცა ხელცარიელი არ დარჩენილან და მშვენიერი ოპალის (ავსტრალიური ძვირფასი ქვა) საბადო აღმოაჩინეს.
მალევე მამა-შვილთან ერთად ჩამოსულმა მუშებმა ავსტრალიის ცხელი კლიმატისგან თავის დასაცავად, საცხოვრებლის მოწყობა მიწაში, მაღაროებს შორის დაიწყეს.
ასე გაჩნდა კუბერ პედის (თეთრი ადამიანის ბუნაგი) პირველი 1500 მიწისქვეშა სახლი.
თანამედროვე მსოფლიოში კუბერ პედი ოპალის მთავარი მომწოდებელია, თუმცა ძვირფასი ქვის შეძენაზე მეტად, აქ ადამიანები მიწისქვეშა სამყაროს საცხოვრებლებისა და მათი სახლების სანახავად ჩამოდიან. აღსანიშნავია, რომ ამ დასახლებას ყოველწლიურად მრავალი ტურისტი სტუმრობს.
მაღაროების, სახლებისა და სასტუმროების გარდა, კუბერ პედში მაღაზიები და ულამაზესი ეკლესიაცაა. მიწისქვეშა მაღაზიებში, წიგნებისა და საყოფაცხოვრებო ნივთების გარდა, მეზობელ მაღაროებში მოპოვებული თვალისმომჭრელი ოპალიც შეიძლება შეიძინოთ. მიწისქვეშა ბარებსა და რესტორნებში კი მეგობრებთან ერთად მოილხინოთ.
კუბერ პედში ამჟამად 2000 ადამიანი ცხოვრობს. ქალაქის მცხოვრებლები თავს კომფორტულად გრძნობენ, რადგან მიწისქვეშა სახლები ჩვეულებრივს არაფრით ჩამოუვარდება და ხშირად უკეთესიც გახლავთ.
- მაღაზიები მიწისქვეშა ქალაქში
- საკუთარი ეკლესიაც აქვთ
- საკუთარი ბარიც აქვთ
- ნათელი დერეფნები
- და მყუდრო საძინებლებიც
