საქართველოს მოსახლეობას აღდგომის დღესასწაულზე არამდგრადი ამინდი ელოდება. სინოპტიკოს თამარ პაპაშვილის განცხადებით, უახლოეს დღეებში ქვეყნის მთელ ტერიტორიაზე ტემპერატურის კლება და ნალექია მოსალოდნელი.
მთავარი პროგნოზი: წვიმა, ქარი და ტემპერატურის ვარდნა.
სადღესასწაულო დღეებში საქართველოში ჰაერის ტემპერატურა საგრძნობლად დაიკლებს და 10-15 გრადუსის ფარგლებში შენარჩუნდება.
დასავლეთ და აღმოსავლეთ საქართველო: მოსალოდნელია წვიმა, რომელიც ზოგან შესაძლოა ძლიერიც იყოს.
მაღალმთიანი რეგიონები: მოსალოდნელია თოვლი, ხოლო მთიან რაიონებში – თოვლჭყაპი.
ღამის საათებში მთაში შესაძლოა თოვლიც აღინიშნოს.
13 აპრილს აღმოსავლეთ საქართველოში იქროლებს დასავლეთის ძლიერი ქარი.
დედაქალაქში 12-13 აპრილს დროგამოშვებით იწვიმებს. არამდგრადი ამინდი 14 აპრილამდე გაგრძელდება, რის შემდეგაც ვითარება შედარებით დასტაბილურდება.
ხალხში გავრცელებულია მოსაზრება, რომ აღდგომის დღეებში წვიმას აუცილებლად მოჰყვება კარგი ამინდები. სინოპტიკოსი განმარტავს, რომ ეს მითი არ არის და წლების მანძილზე წარმოებულ დაკვირვებას ეფუძნება.
„ეს წლების მანძილზე დაკვირვებაა. მომდევნო დღეებში ამინდი მართლაც გამოსწორდება, თუმცა გაზაფხულისთვის დამახასიათებელი ცვალებადობის გამო, დღის ბოლოს შესაძლოა კვლავ გაუარესდეს,“ – აღნიშნავს თამარ პაპაშვილი.
თუ სადღესასწაულოდ გარეთ გასვლას გეგმავთ, თან იქონიეთ ქოლგა და მოემზადეთ შედარებით გრილი დღეებისთვის.
