რა მიმოწერა გავრცელდა „ქართული ოცნების” პოლიტსაბჭოს ჩატიდან?

ტელეკომპანია “ფორმულა” ავრცელებს ჩანაწერებს “ქართული ოცნების” პოლიტსაბჭოს ჩატიდან, სადაც ჩანს, რას წერს მაშინ პრემიერმინისტრის პოსტზე მყოფი გიორგი გახარია პარტიის წევრებს ნიკა მელიას დაკავებასთან დაკავშირებით. ამავე სქრინებში ჩანს “ოცნების” წევრების, მათ შორის თეა წულუკიანისა და სოზარ სუბარის პასუხებიც, რომლებმაც გახარიას გადაწყვეტილება მოუწონეს | მიმოწერა 2021 წლის 17 თებერვლით თარიღდება. ამ საკითხთან დაკავშირებით დღეს გახარიამ წულუკიანის “საგამოძიებო კომისიის” სხდომაზეც ისაუბრა და თქვა, რომ ის მელიას იმ ფორმით დაკავების წინააღმდეგი იყო, რა ფორმითაც დააკავეს
💬 “ვთვლი, რომ უნდა გაგიზიაროთ ჩემი პოზიცია მელიას დაკავების გადაწყვეტილების აღსრულებასთან დაკავშირებით. ვფიქრობ, რომ დაუშვებელია მისი დაკავება დაუყოვნებლივ, ენმ-ს ოფისში. როგორც ხედავთ, დღეს იქ იმყოფება ყველა ოპოზიციური პარტიის ლიდერი, მაქსიმალურად მობილიზებულია ყველა ფიზიკური და ოპოზიციური მედია რესურსი. სრული მზაობა აქვთ ორგანიზებული წინააღმდეგობის გასაწევად მიზანმიმართული პროვოკაციების მოწყობის ჩათვლით.
ამ პირობებში ოპოზიციური პარტიის შენობის შტურმი უკიდურესად არაგონივრულია და გაუმართლებლად მაღალი რისკების მატარებელია. პოლიციას არ აქვს დახურულ შენობაში ასეთი ტიპის ოპერაციის ჩატარების გამოცდილება, რაც მნიშვნელოვნად ზრდის ოპერაციის ჩატარებასთან დაკავშირებულ რისკებს. დადასტურებულად შეიძლება ვთქვათ, ძალის გადამეტების ბევრი შემთხვევა გვექნება.
ყველას კარგად გვესმის, რომ ასეთ პირობებში ოპოზიციური პარტიის ოფისში სპეცოპერაციის ჩატარება ვერ იქნება შეფასებული პროპორციულ ქმედებად, რასაც მოჰყვება უკიდურესად მწვავე საერთაშორისო რეაქცია. ვთვლი, რომ ამ ვითარებაში მაღალია იმის ალბათობაც, რომ მელიას დაკავების […] თუნდაც ხვალ. ვფიქრობ, რომ ყველას გვმართებს მეტი პასუხისმგებლობა და გონივრულობა. სასამართლოს გადაწყვეტილების აღსრულება უნდა მოხდეს გააზრებულად, რისკების სწორი მართვით და პროპორციული ძალის გამოყენების პრინციპების დაცვით.
ამ პოზიციას გამოვხატავ როგორც პრემიერმინისტრი, რომელიც პასუხისმგებელია აღმასრულებელი ხელისუფლების, მათ შორის შსს-ს ქმედებებზე.
შესაბამისად, დაკავება უნდა მოხდეს მაშინ, როდესაც რისკები იქნება სწორად გააზრებული და მინიმუმამდე დაყვანილი” | წერს გახარია გავრცელებულ “სქრინში”
🔻💬 “ეგდოს სოროში, სანამ არ მოწყინდება, ერთადერთი, რაც საჭიროა, არის სწორი კომუნიკაცია. აბუჩად არიან ასაგდები. სულელები უნდა ვიყოთ, რომ იქ შევიჭრათ. მათაც ეს უნდათ” | წერს წულუკიანი გახარიას პასუხად.