ყოფილი სამხედრო ექიმი და მწერალი, ნინო ახობაძე, სოციალურ ქსელში სულის შემძვრელ პოსტს აქვეყნებს, რომელიც გარდაცვლილ მეგობარს მიუძღვნა.
“რამდენიმე დღის წინ, დილის ექვსზე მესინჯერში მომწერა “ნუცი, არ გძინავს”? არც მეო… ის ქმარს უვლიდა, მე დედას; არასოდეს დაუსვამს ზედმეტი კითხვა, ზუსტად ხვდებოდა როდის და რა მტკიოდა;
იქამდე ცოტა ხნით ადრე უცნაური რაღაც მითხრა – არ გინდაო? პატარა უკრაინელი გოგო რომ იშვილოო? წარმოიდგინე გვერდით რომ გიწევს ერთი ბეწო ცისფერთვალება გოგო და დედას რომ დაგიძახებსო; ოღონდ ეს მერე, როცა შენი დედა აღარ გეყოლება, ვიცი რომ ახლა მაგის თავი არა გაქვსო; ისე გავღიზიანდი ამაზე, ისე ვუპასუხე, მგონი ეწყინა, მაგრამ არ მაგრძნობინა.- შვილის ნერვები მაქვს ახლა მე-მეთქიი??? თან ხომ არ დაგავიწყდა რამდენი წლის ვარ-მეთქი!და -კაი, კაიო…
მერე ტელეფონზე ვილაპარაკეთ, დავიხოცეთ სიცილით; ბოლო ღამეებია გიჟივით შევდივარ ჩვენს ჩატში და მაგის ხმოვან შეტყობინებებს ვუსმენ, ასჯერ, ათასჯერ… ვერ ვძღები. ყველაზე კეთილი, ყველაზე მხიარული და სიცოცხლით სავსე ჩემი ყველაზე დიდი გულშემატკივარი და საუკეთესო მეგობარი აღარ მყავს. ახლა აღარც ვიცი ჩემს თავს ვტირი, თუ იმას.
სამი ყველაზე შეუსაბამო და უაზრო სიტყვა, რომელიც ოდესმე გამიგია: ეკა მიქაუტაძე მოკვდა. ამას რად უნდა სტატუსი ან კომენტარი, რა კომენტარი უნდა გააკეთო ადამიანმა ამაზე აბა “გითანაგრძნობ”? თუ “ვიზიარებ”? მე არ ვარ ეკას ჭირისუფალი, მე ეკას მეგობარი ვარ, ამ სიტყვის საუკეთესო გაგებით; პირველად მომიკვდა დაქალი. ეს სიმწარეც ვნახე.
გაუგემურებული დღეები მიდის ჩემთვის და, აი ვზივარ, სულ ვფიქრობ – ამდენი ტკივილის პატრონს, როგორ შეეძლო ასეთი ყოფილიყო? გოგო – სიყვარული, გოგო – ტაქტი, გოგო – ბედნიერება. დედა ენატრებოდა საშინლად, მე ვგრძნობდი მის ტკივილს და როცა იცინოდა, სევდასაც ვგრძნობდი; არ ვიცი იქნებ მართლა კარგები მიჰყავს იქ თავისთან უფალს, რომ ამ ბოროტებით და ღვარძლით გატენილ დედამიწას გაარიდოოს?
რეებზე და ვისზე ნერვიულობთ ხალხო? ჯანმრთელი ლაღი გოგო შევიდა სამზარეულოში, ჩაიკეცა და ერთ წუთში დამთავრდა.
იცი როგორი გოგო იყო? დედა იყო ყველასი. ამხელა და ამდენი სიტყვების რახა-რუხი ჯერ მე აქ არ დამიწერია; უბრალოდ მტკივა ჩემი ეკა. დავდივარ, შოკში ვარ და გულში ვეჩხუბები: – ეს რა ქენი გოგო, გაგიჟდიი????
მე კარგად ვარ, ვინც მკითხულობთ; მე კიდეც ვიცოცხლებ, კიდეც გავიცინებ და ცხოვრებაც გაგრძელდება…. მიყვარხარ შე გადარეულო! არც იცი რას გიზამ, როცა მეც მოვალ მანდ!…..“ – წერს ნინო ახობაძე.
