– ნაკლი ყველას აქვს და გამონაკლისი არც მე ვარ! – ყველა ქალს ამ ფრაზით ეცნობოდა ნოდარი. – ღარიბი ვარ და აშენებას ვერ დაგპირდები. უპატრონოს და ობოლს არავინ წამაშველა ხელი, თორემ პრეზიდენტად თუ არა, მინისტრად მაინც ვივარგებდი…
– კი! – შეაწყვეტინა ნელიმ. – ლაპარაკის მიხედვით თუ ვიმსჯელებთ, სწორედ სამინისტრო კაცი ბრძანდებით…
– დამცინით?! – ეწყინა კაცს.
– არა… რატომ?!. – აიჩეჩა მხრები ქალმა. – ენა და ლოგიკა არ დაგეწუნებათ…
მათ გაზეთში გამოქვეყნებული განცხადებებით იპოვეს ერთმანეთი…
ნოდარს, რა თქმა უნდა, არ გაუმხელია, რომ ზარმაცი იყო, მაგრამ ჭამა-სმა ძალიან უყვარდა. არც ის უთქვამს ქალისთვის, რომ მისი უქნარობით თავმობეზრებულმა მამამ მთელი თავისი ქონება მის დებზე გადაუფორმა და ფაქტობრივად, უსახლკაროდ დატოვა. მანაც დაჰკრა ფეხი და წამოვიდა ქალაქში:
– ჩემი გარეგნობის პატრონს რომელი ქალი დამიდგება წინ… ჩავესიძები მდიდარ ოჯახს და ვიცხოვრებ მეფურად. ტყუილად არ მოადგეთ ჩემს კარს, მაინც არ გაგიღებთ და შემოგიშვებთ შიგო…
როცა განცხადებას აქვეყნებდა, არ დაუმალავს, რომ ღარიბი და უქონელი იყო:
“ვეძებ ქალს – ბინიანს, შეძლებულს… უნაკლო გარეგნობის მქონე კაცი…”
ნელის თავისი ამბავი ჰქონდა. ბავშვობაში არც მას ჰქონია უზრუნველი ყოფა. ქვრივი დედა ზრდიდა და ერთ ოთახში შეყუჟულებს შიმშილიც ბვერი ახსოვდათ, სიცივეც და მკბენარის შემოსევაც, რამაც მისი ბედი საბოლოოდაც განსაზღვრა…
სად იყო მის ბავშვობაში ამდენი რეკლამა და ტილებთან ბრძოლის უებარი საშუალება?! დედამ გოგოს მეზობლისგან ნასწავლი “წამალი” შეაზილა თმაში – ნავთში არეული რაღაც მყრალი ბალახის ნარევი. ტილები კი დაიხოცნენ, მაგრამ ისე დაეწვა თავის კანი, სულ დასცვივდა თმა და… აღარც ამოსვლია მას შემდეგ.
ნიკელივით მოუპრიალდა თავი. ლუპითაც რომ გეძებნათ, ერთ ბეწვს ვერ იპოვიდით ვერსად… მთელი ბავშვობა თავსაფარწაკრულმა გაატარა. როცა წამოიზარდა, მამიდებს შეეცოდათ და პარიკი უყიდეს…
ახლა პარიკების მთელი კოლექცია აქვს და ის ქონებაც, ასე რომ იზიდავს კაცებს. სტუდენტობაშივე აღმოაჩნდა ვაჭრობის ნიჭი და 35 წლისას უკევ 3 მაღაზია აქვს საკუთრებაში – “ტავარი” პირდაპირ იტალიიდან და პარიზიდან ჩამოაქვს.
თურქულს და ჩინურს როგორ აკადრებს კლიენტებს?!. მთხოვნელიც გამოუჩნდებოდა ხოლმე დროდადრო. როცა საქმე “გადაწყვეტამდე” მივიდოდა, მომავალ ქმარს სიმართლეს ეუბნებოდა და როგორც კი მის მელოტ თავს დაინახავდნენ, კისრისტეხით გარბოდნენ კაცები…
ისე, არც ტყუოდნენ: რაღაცნაირი თავი აქვს, თითქოს წამართკუთხებული და უკნიდან გაბრტყელებული, დიდი ზომისაც…
ახლა გადაწყვიტა, მანამ არ გაემხილა საქმროსთვის თავისი ნაკლის შესახებ, სანამ საწოლში არ შეიტყუებდა… შვილი უნდოდა ძალიან, თორემ კაცი მერე ჯანდაბაშიც წასულიყო…
ნოდარი გარეგნულად მოეწონა:
– ძალიან მდიდარი ვარ! – უთხრა პირდაპირ. – საკუთარი სახლიც მაქვს, მანქანაც, ბიზნესიც… თუ ცოლად შემირთავ, იმ დღესვე გიყიდი იმ მანქანას, რომელსაც ხელს დაადებ…
– აუჰ! – შეწუხდა და შეშფოთდა ნოდარი. – როგორც ჩანს, ნამეტანი დიდი ნაკლი გაქვთ, თქვენც, ქალბატონო… ალბათ შეგაცდინათ, ხომ ვიღაც უნამუსომ?! – აღარ უთხრა, რაც გაიფიქრა ბოზობაზე…
– ქალიშვილი ვარ, ხელდაუკარებელი! – ისევ მიკიბ-მოკიბვის გარეშე უთხრა ქალმა.
– აბა, რა გჭირთ ამისთანა?! – ცნობისმოყვარეობამ გააგიჟა კაცი – იქნებ…
– არავითარი “იქნებ”! – მკაცრად მოუჭრა ნელიმ – მე ქმარი მჭირდება და გყიდულობ, რასაც ისურვებ, მიიღებ და… მეც ისეთს მიმიღებ, როგორიც ვარ…
ისედაც დაბნეული კაცი კიდევ უფრო რომ დაეინტერესებინა, სახლში დაპატიჟა. ახალთახალ “ინფინიტის” ჯიპში გვერდით მოისვა და ყველაზე მდიდრული დასახლებისკენ აიღო გეზი…
– გაფიცებ ყველაფერს, რა ნაკლი გაქვს ასეთი?! – კიდევ უფრო გადაირია ნოდარი, როცა მდიდრულად მოწყობილი ოთახები დაიარა…
– მხოლოდ ქორწილის შემდეგ გაიგებ! – კატეგორიულად უთხრა ქალმა და მოსაფიქრებლად ერთი კვირა მისცა.
ნოდარი დათანხმდა – ნელი ქალად გადაცმული ეშმაკიც რომ გამომდგარიყო, მის ქონებაზე იმ შემთხვევაშიც ვერ იტყოდა უარს.
პატარა, მაგრამ მდიდრული ქორწილი გადაიხადეს. სასწაულის დაიჯერეს მისმა სოფლიდან ჩამოსულმა ნათესავებმა, რომლებიც უფრო იმიტომ დაპატიჟა – “გულზე რომ გაეხეთქა”…
მერე კი ის დროც დადგა, როცა სიძე-პატარძალი მარტონი დარჩნენ საძინებელში:
– ახლა ჩემს საიდუმლოსაც გაიგებ, მაგრამ გაქცევას ტყუილად იფიქრებ, ყველა კარი ჩარაზულია! – უცნაურად შეხედა ცოლმა ნოდარს და… პარიკი მოიძრო…
საბრალო კაცმა ვერაფრით წარმოიდგინა, რომ ამ უფორმო თავის პატრონი ქალი შეიძლებოდა ყოფილიყო. შეშინებულმა გულზე წაივლო ხელი:
– კაცი ხარ? გეი? და ახლა?!. – გული წაუვიდა. თითქოს ნელი კი არა, ის ყოფილიყო პირველი ღამის მომლოდინე პატარძალი…
შემდეგ რა მოხდა, ვერ გეტყვით, – არც ნელი ამხელს დეტალებს და არც – ნოდარი. ფაქტია, ნელის ტაქტიკამ გაამართლა: წლისთავზე წყვილს ბიჭი შეეძინა…
გთხოვთ მოიწონეთ და გააზიარეთ სტატია.. ასევე გაგვიზიარეთ თქვენი აზრი კომენტარებში..
წყარო: ინგა ჯაყელი; წყარო: სტატია მომზადებულია ჟურნალ გზაში გამოქვეყნებული სტატიის მიხედვით..
ყურადღება: ფოტო პირობითია
