„ჩემს შეყვარებულს ჩემზე უთხრეს, ფულიან ბიჭებზე ნადირობსო, თუმცა ეს ყველაფერი არ იყო..“

ჩემი შეყვარებული შეძლებული ოჯახიდან არის, მაგრამ არც მე მყავს ღარიბ–ღატაკი მშობლები. ერთმანეთი წლინახევრის წინ გავიცანით. “ფეისბუქზე” დაქალებთან ერთად გადაღებული ფოტო ავტვირთე, რომელსაც ცუდი კომენტარი გაუკეთა.

ძალიან გავბრაზდი და მივწერე, ჩემთვის უცნობი ადამიანი ხარ და ასეთი რამის გაკეთების უფლება არ გქონდა–მეთქი. მიპასუხა, მალე გაგიცნობ და უცნობები აღარ ვიქნებითო.

ძალიან მხიარული რაღაცეები მომწერა და წყენა მაშინვე გამიქრა. ყოველდღე მწერდა, უნდა გაგიცნო, რომ შენთვის უცნობი ბიჭი აღარ ვიყოო.

ერთი თვის შემდეგ მართლაც შევხვდი. სხვა ბიჭებისგან გამორჩეულია, სულ სხვანაირად ლაპარაკობს, ძალიან სიმპათიურია, კულტურული, კარგ განათლებას იღებს და, მითხარით, რატომ არ შემიყვარდებოდა?! თანაც ძალიან ყურადღებიანია.

სულ იმაზე ფიქრობს, რითი მასიამოვნოს, რითი გამახაროს. მგონია, რომ ჩემი სულის ნაწილია, სიგიჟემდე მიყვარს. მის გარეშე ცხოვრებას ვერ შევძლებ. მასაც ვუყვარვარ.

მეუბნება, სკოლას დაამთავრებ თუ არა, მაშინვე ცოლად გამომყევიო. დედამისმაც მითხრა, შენი უმაღლესში ჩარიცხვა ჩვენს სახლში უნდა აღვნიშნოთო.

წერილის დასაწყისში ვთქვი, რომ ჩემს შეყვარებულს შეძლებული ოჯახი ჰყავს, მამამისი საკმაოდ მდიდარი კაცია. ჩემმა კლასელებმა და მეზობელმა გოგონებმა ჭორაობა დაიწყეს, თითქოს იმიტომ შემიყვარდა, რომ მდიდარია. ერთმა ისიც კი მითხრა, ეგ რომ ღარიბი იყოს, ზედ არ შეხედავდიო. ძალიან გავმწარდი!

თავიდან სულ არ ვიცოდი, მდიდარი იყო თუ არა, მაგრამ მომეწონა და შემიყვარდა. ყველაზე ცუდი ის არის, რომ შეყვარებულის ყურამდე მიიტანეს, რომ მე სიმდიდრეს ვარ დახარბებული. ანონიმური “ლინკით” ვიღაცას “ფეისბუქში” მიუწერია, შენი შეყვარებული ფულიან ბიჭებზე ნადირობს, შენზე მდიდარს თუ ნახავს, მაშინვე მიგატოვებსო.

მართალია, შეყვარებულს ამის გამო ჩემთვის არაფერი უთქვამს, ეჭვიანობა არ გამოუმჟღავნებია, მაგრამ გავიგე, რომ ჩემს ნაცნობებში კითხულობს, ადრე შეყვარებული მყავდა თუ არა.

ის პირველი სიყვარულია ჩემთვის, მაგრამ ხომ შეიძლება რომელიმე ბოროტმა ადამიანმა უთხრას, კი, ჰყავდაო, მერე რა მეშველება?

არ მესმის, ამ ხალხს ჩემი ბედნიერება რატომ არ უხარია? მე ხომ მათთვის არაფერი დამიშავებია? ყველას ვთხოვ, ჩვენ შორის ნუ ჩადგებიან და საყვარელ ადამიანს ნუ დამაშორებენ!

გთხოვთ მოიწონეთ და გააზიარეთ სტატია.. ასევე გაგვიზიარეთ თქვენი აზრი კომენტარებში..

“სარკის” ერთგული მკითხველი, 17 წლის