სურსათის ეროვნულმა სააგენტომ გორში, აგრარულ ბაზარში “გეორგია XXI” გასაყიდად გამოტანილი თევზის შემოწმების შედეგად, პროდუქტში ჯანმრთელობისთვის საშიში ნივთიერება – ლეუკო მალაქიტის მწვანე აღმოაჩინა.
სურსათის ეროვნულ სააგენტოში ამბობენ, რომ აღნიშნული ფაქტის შესახებ, რეაგირებისთვის რეგიონულ სამმართველოს და ვეტერინარულ დეპარტამენტს ეცნობა.
მსოფლიო ჯანმრთელობის ორგანიზაცია ამბობს, რომ აღნიშნული ნივთიერება წარმოადგენს ქიმიურ ნაერთს, რომელსაც თევზის მოშენებისას იყენებენ, როგორც ანტიპარაზიტულ საშუალებას.
აღნიშნული ნივთიერების გამოყენება ევროკავშირის და აშშ-ს ქვეყნებში აკრძალულია, რადგან FDA-ს ცნობით, არაერთმა კვლევამ დაადასტურა, რომ მალაქიტის მწვანემ შესაძლოა დააზიანოს დე-ენ-ემი, ასევე ზრდის კიბოს განვითარების რისკს, ორგანიზმში გრძელვადიანად გროვდება და აზიანებს ღვიძლს და თირკმელს.
