„ბავშვები ეზოში თამაშობდნენ დახუჭობანას და ნინიკოც დაიმალა, სარდაფთან ორმოსავით ადგილას ჩავრდა… ყვიროდა თურმე, შველას ითხოვდა…“, – თემქაზე მომხდარი უმძიმესი ტრაგედიის დეტალები

არის რაღაც რისიც არ გვჯერა, მაგრამ არსებობს, ქვეცნობიერში მელაპარაკება ნინო, მასწავლის რა ვქნა და როდის, ახლა ერთად ვართ, ჩაეძინა, მშვიდ მუსიკას ვუსმენთ, მამა შენ ამქვეყნისთვის ზედმეტად კარგი ხარ, შენი სული იქაა, სადაც ანგელოზები არიან. მადლობა რომ იქიდან ზრუნავ! იქ შევხვდებით მა, ათი წელია სიყვარულს მასწავლიდი, ახლა შენ მასწავლე მა ამ ჯოჯოხეთში სიარული მა. შენ სულ ჩემს გულში იქნები მამა”,- ეს უმძიმესი სიტყვები დაწერა სოციალურ ქსელში 13 ივნისს დაღუპული 10 წლის გოგონას მამამ, გიორგი ჩორგოლაშვილმა. ენითაუღწერელია ამ ოჯახის ტრაგედია, რომელმაც ყველა სულით ხორცამდე შეძრა. ვერანაირი სიტყვა, ვერანაირი ძალა, არაფერი გაანელებს ამ ტკივილს, რასაც ახლა ოჯახი განიცდის. საშინელი რეალობის წინაშე არიან დღეს. თამუნა და გიორგის არ ჰყავთ მათი ულამაზესი გოგონა, რომელიც 10 წელი მათ ცხოვრებას აფერადებდა. ამ დღეებში ნინომ მეოთხე კლასი დაასრულა, დაწყებითების პედაგოგს თანაკლასელებთან ერთად გამოემშვიდობა და მომავალ წელს ცხოვრების ახალი ეტაპი უნდა დაეწყო, მეხუთე კლასში უნდა ესწავლა, მაგრამ საშინელი ტრაგედია დატრიალდა.

უმძიმესი ფაქტი 13 ივნისს, თბილისში, თემქის მესამე მიკრო რაიონში დატრიალდა. 10 წლის გოგონა, ნინო ჩორგოლაშვილი მისი საცხოვრებელი კორპუსის ეზოში ბავშვებთან ერთად თამაშობდა, როცა მოულოდნელად ბავშვი კიბიდან გადავარდა, სადარბაზოსთან დაგროვილ ნაგავში ჩავარდა, სადაც სხვადასხვა სახის ნარჩენები და შუშები ეყარა, როგორც ჩანს, ბავშვმა დაზიანება მიიღო, ეტყობა არტერია დაუზიანდა, სისხლისგან ისე უცებ დაიცალა, რომ მისი გადარჩენა სამწუხაროდ, ვერ მოხერხდა. ენითაუღწერელია ის ტკივილი, რასაც ახლა ის ადამიანები განიცდიან, ვინც სიცოცხლით სავსე პატარა გოგონას იცნობდა. საუბარი ყველას უჭირს.

“ვერ გამოვხატავ რამხელა გულის ტკივილია ეს ლამაზი გოგო. ჩემი სახლის კიბესთან ჩავარდა, შუშები და სხვადასხვა ნივთები ეყარა, დაზიანდა და დაიღუპა. საცოდაობა ტრიალებდა აქ, ვერ ვისაუბრებ, ძალა არ მაქვს”, – მითხრა იმ კორპუსში მაცხოვრებელმა და საუბრის გაგრძელება ვეღარ შეძლო.

როგორც აღვნიშნე ნინო 10 წლის იყო, თბილისის 142-ე საჯარო სკოლის მოსწავლე.

“გარდაიცვალა ჩვენი სკოლის IVდ კლასის მოსწავლე, ნინო ჩორგოლაშვილი. ეს ტრაგედია დიდ ტკივილს გვაყენებს ყველას, ვინც მას იცნობდა – დამრიგებელს, მასწავლებლებს, თანაკლასელებს, სკოლის თითოეულ წევრს. ნინო იყო ნათელი, კეთილი და გულთბილი, ომელიც ყოველთვის სიყვარულითა და სითბოთი ავსებდა ირგვლივ მყოფებს. მისი მოულოდნელი წასვლა უდიდესი დანაკლისია ჩვენი სკოლისთვის. სკოლის თითოეული წევრი ვიზიარებთ ოჯახის მწუხარებას”- ნათქვამია სკოლის ფესბუქ გვერდზე გავრცელებულ სამძიმრის წერილში.

მომხდარით შეძრულები არიან მეზობლები.

„განადგურებულები ვართ ამ ამბით. წარმოუდგენელი ტრაგედია დატრიალდა. ჩვენ ვცხოვრობთ თემქაზე ძველი რუსული სკოლის შენობაში. იქ წლების წინ შეასახლეს დევნილები და ამ კორპუსშია ეს დიდი უბედურება მომხდარი. ჩვენს თვალწინ გაიზარდა ნინო, სულ ჩემს ბავშვებთან თამაშობდა ეზოში. პირველ სართულზე აქვთ ბინა. ოჯახი სამ შვილთან ერთად ცხოვრობს. ნინოს უფროსი და და პატარა ძმა ჰყავს. ძალიან დამჯერე და უსაყვარლესი ბავშვი იყო. დედამისი როცა სამსახურში იყო, ბავშვები სახლიდან არ გადიოდნენ, ფანჯარასთან იდგნენ და იქიდან იყურებოდნენ ხოლმე. დედა როცა იყო სახლში, ბუნებრივია რთავდა ეზოში თამაშის უფლებას, თვითონ სულ ფანჯრიდან აკონტროლებდა, სულ მოიკითხავდა და სულ მისი თვალთახედვის არეში იყვნენ ბავშვები. ძალიან საყვარელი, სიცოცხლით სავსე ბავშვი იყო. განადგურებულია მთელი ოჯახი და ძალიან განვიცდით ყველანი. არ ვიცი რა ვთქვა ამ ვითარებაში. მართლა შოკში ვართ მთელი კორპუსი, ამხელა უბედურება დატრიალდა. გუშინ წინ წვიმამ რომ გადაიღო, მას შემდეგ მოხდა ეს ტრაგედია. ბავშვები ეზოში თამაშობდნენ დახუჭობანას. ეტყობა ნინიკოც დაიმალა, ვფიქრობ ჩაიცუცქა, თორემ სხვაგვარად არ ვიცი როგორ ჩავარდებოდა. ბავშვი სარდაფთან ორმოსავით ადგილას ჩავრდა. იქ ყრია ყველაფერი: შუშები, ხის სკამის დამტვრეული ფეხები, რკინა და ათასი ნაგავი, ამბობენ, სკამის ფეხს დაარტყა ყურის არე, ან შესაძლოა შუშის ნამსხვრევებს და ამისგან ბავშვს ჭრილობა ჰქონდა ყურის მიდამოში, როგორც ჩანს არტერია დაუზიანდა. მერე ყვიროდა თურმე ბავშვი, შველას ითხოვდა, ისევ ბავშვებს გაუგიათ და მისულან იქ, თვითონ რომ ნახეს ბავშვს ვერ ეხმარებოდნენ, გაქცეულან უფროსებთან და მათთვის უთხოვიათ დახმარება. ამოუყვანიათ ბავშვი, სისხლი სდიოდა და სამწუხაროდ საავადმყოფოში გადაყვანა ვერ მოხერხდა, ბავშვი სისხლისგან დაიცალა. წნევაც დაუვარდაო და გარდაიცვალა. არ ვიცი, ამის გააზრებაც მიჭირს. საშინელი ტკივილია, საშინელი სტრესი, ორი დღეა აზრზე ვერ მოვდივართ, ეს არ უნდა მომხდარიყო. საცოდავი მისი მშობლები, რომლებსაც სანუგეშო სიტყვას ვერ ვეუბნებით. ძალიან მზრუნველი მშობლები ჰყავდა, ბავშვები ვინც შეესწრო ამ ამბავს საშინელი სტრესის ქვეშ არიან. როგორც ვიცი, ნინოს დაც იყო ეზოში. მასზე დიდი და ჰყავს და პატარა ძმა, სულ ერთად იყვნენ. როგორც გავიგე იმ დროს ძმა არ ყოფილა გარეთ. არადა ისეთი ბავშვი იყო, რომ მშობლებთან შეთანხმების გარეშე გარეთ რომ არ გადიოდა. თან ნაწვიმარი რომ იყო, ცოტა ბნელოდა იმ დროს, საღამოხანს მოხდა ბავშვი კი გადაიყვანეს საავადმყოფოში, მაგრამ ფაქტობრივად იქვე დაიცალა სისხლისგან სანამ იმ თხრილიდან ამოიყვანეს. სავარაუდოდ, არტერია დაიზიანდა, სხვანაირად ასე უცებ როგორ დაიცლებოდა სისხლისგან.

სარდაფიც არ ითქმის, რაღაც ოთკუთხედია, ერთი მეტრის სიღრმით და იქ ყრია უთვალავი ნაგავი. არც ერთ მაცხოვრებელს არ უფიქრია ეს რომ საფრთხეს წარმოადგენდა, თორემ აგურებით შეიძლებოდა იმ ადგილის ამოვსება, ორი წყება აგური საკმარისი იქნება ამოსავსებად და ეს ტრაგედია არ დატრიალდებოდა. ეს ორმოსავით ადგილი სანაგვედ იყო გამოყენებული და უამრავი სხვადასხვა ნივთი იყო ჩაყრილი. მინდა მის ოჯახს სამძიმარი ვუთხრა, დაგვამუნჯა ამ ტრაგედიამ”, – ამბობს ჩვენთან საუბარში იმ კორპუსში მაცხოვრებელი.

როგორც უკვე აღვნიშნეთ, ვარაუდობენ, რომ ბავშვს მოხვედრილი საგნისგან დაუზიანდა საძილე არტერია და სისხლისგან დაიცალა, ზოგიერთი იმასაც ამბობს, რომ პატარას შესაძლოა ფუძის ძვალი ჰქონდა დაზიანებული. ცხედარს ექსპერტიზა ჩაუტარდა და ექსპერტიზით გაირკვევა მეტი დეტალი.

წყარო: „კვირის პალიტრა”