46 წლის იოსებ გორგაძე, რომელიც მძიმე დაზიანებებით გლდანის მე-8 პენიტენციური დაწესებულებიდან კლინიკა „ვივა მედში“ ჯერ კიდევ იანვარში გადაიყვანეს, რამდენიმე თვის კომაში ყოფნის შემდეგ გარდაიცვალა. მისი ოჯახი ინფორმირებულია, რომ გორგაძე სიცოცხლესთან შეუთავსებელი ტრავმებით სასჯელაღსრულების დაწესებულებიდან იყო გამოყვანილი.
“გუშინ, დაახლოებით 22:00 საათზე, ოჯახის წევრებს აცნობეს, რომ იოსებ გორგაძე გარდაიცვალა. ის სამი თვე ებრძოდა სიცოცხლისთვის, თუმცა მიღებული დაზიანებები კრიტიკულად მძიმე იყო”, – აცხადებს გარდაცვლილის ადვოკატი მუხრან ღურწკაია.
ადვოკატის თქმით, პატიმარს სხეულზე დაახლოებით 30-მდე მოტეხილობა აღენიშნებოდა, მათ შორის სახის ძვლების მრავალმხრივი დაზიანება და ტვინის შეშუპება. ღურწკაიას განცხადებით, იოსებ გორგაძე სასჯელაღსრულების დაწესებულებაში სასტიკად სცემეს და წამების მსხვერპლი გახდა, თუმცა დღემდე უცნობია, ძალადობა თანაპატიმრების თუ ციხის თანამშრომლების მხრიდან განხორციელდა.
მიუხედავად მძიმე ფაქტისა, ადვოკატი ამბობს, რომ გამოძიებას დღემდე არავინ დაუდანაშაულებია:
“დასაწყისში საქმე საქართველოს სსკ-ის 118-ე მუხლით დაიწყო, რაც ჯანმრთელობის განზრახ ნაკლებად მძიმე დაზიანებას გულისხმობს. მხოლოდ გარდაცვალების შემდეგ გადაეცა საქმე სპეციალურ საგამოძიებო სამსახურს”, – აღნიშნავს ღურწკაია.
არსებული ინფორმაციით, კლინიკაში შეყვანისას გორგაძეს ინსულტის დიაგნოზი დაუსვეს. კლინიკის წარმომადგენელი ზურაბ ჩხაიძე აცხადებდა, რომ პაციენტი მართვით სუნთქვაზე იმყოფებოდა, თუმცა დეტალებზე საუბარს ერიდებოდა. პენიტენციური სამსახურის მხრიდან ამ დრომდე ოფიციალური კომენტარი არ გაკეთებულა.
იოსებ გორგაძე ავარიის შემდეგ დააკავეს. შემთხვევა მაშინ მოხდა, როდესაც ის სავარაუდოდ თბილისიდან წალკაში, „ქართული ოცნების“ მხარდამჭერი აქციიდან მიმავალ აქტივისტებს შეეჯახა. ავარიის შედეგად არავინ დაშავებულა.
წყარო: inews.ge
