გიორგი ბაჩიაშვილი, რომელიც ბრალდებულია ე.წ. „ბიტკოინების“ და „მტკვარი ჰესის“ საქმეებში, 29 მაისს გამართულ სასამართლო სხდომაზე თავისი საქართველოში დაბრუნების დეტალებზე ისაუბრა. მისი თქმით, ის 24 მაისს საზღვარგარეთიდან გაიტაცეს, ორი დღის განმავლობაში თვალებახვეული ჰყავდათ და არ მისცეს დაკავშირების უფლება ადვოკატთან, პროკურორთან ან ოჯახის წევრებთან. მოგვიანებით, „აირზენას“ თვითმფრინავით, ყოველგვარი სამართლებრივი პროცედურის გარეშე ჩამოიყვანეს საქართველოში.
ბაჩიაშვილი აცხადებს, რომ მის წინააღმდეგ წარდგენილი ბრალდებები ფაბრიკირებულია და მის უკან დაბრუნებას საერთაშორისო სამართლის დარღვევა უკავშირდება:
„არ ვარ დამნაშავე არცერთ სისხლის სამართლის საქმეში, რომელიც ჩემ წინააღმდეგ არის ფაბრიცირებული. დღეს მე ვარ ბიძინა ივანიშვილის პირადი პატიმარი და დღეს მე კიდევ ერთ საერთაშორისო დანაშაულს შეგატყობინებთ.“
მისი მტკიცებით, საქართველოს მთავრობაში მოქმედმა „დანაშაულებრივმა ჯგუფმა“ განახორციელა სპეცოპერაცია, რომელსაც საერთაშორისო მასშტაბები აქვს და ეფუძნება სხვა სახელმწიფოს შეცდომაში შეყვანას.
