ექიმი გიორგი ღოღობერიძე გადაცემაში“მთავარი დიაგნოზი” რამდენიმე თვის წინ განმარტავდა, თუ რამდენად უსაფრთხოა სველი თმით გარეთ გასვლა.
– “სველი თმით გარეთ არ გახვიდე, გაცივდები, შეიძლება ამ ყველაფერს ფილტვების ანთება მოჰყვეს, შეიძლება მენინგიტითაც გართულდეს, დაგემართოს შუა ყურის ანთება, წიაღების ანთება და მოკვდე კიდევაც” – მსგავსი ფრაზები მთელი ბავშვობა მესმოდა და მჯეროდა. მოგიყვებით, რამდენად მართალია ის ფაქტი, რომ სველი თმით გარეთ გასვლა არ შეიძლება, ან თუ ახლახან იბანავე, არის თუ არა სველი თმით დაძინება კარგი იდეა:
თუ ახლახან იბანავეთ და თმა სველი გაქვთ, გარეთ გასვლით არანაირი ფილტვების ანთება, თავის ტვინის გარსების ანთება, შუა ყურის ან წიაღების ანთება არ დაგემართებათ. თქვენ რომ აღნიშნული დაავადებები დაგემართოთ, თითოეულ მათგანს გამომწვევი სჭირდება. ეს შეიძლება იყოს ვირუსი, ბაქტერია, სოკო, პარაზიტი, რაიმე პათოგენი. ისინი უბრალოდ თავზე წყლის მისხმითა და შემდეგ სიცივეში გასვლით არ ვრცელდებიან. ინფექცია რომ დაგვემართოს, პირველ რიგში, აუცილებელია, რომ კონკრეტული ინფექციისათვის დამახასიათებელი ნიშნების მქონე ადამიანთან გვქონდეს კონტაქტი, ან პათოგენის მატარებელ ადამიანთან ვსაუბრობდეთ. მაგრამ, თუ სველი თმით გარეთ ფეხბურთს ითამაშებთ, ნამდვილად არ გაცივდებით. ეს ყველაზე ცრუ მითია, რომელიც დღევანდელ რეალობაში არსებობს. მარტივად რომ ვთქვათ, თუ მშობელი ხართ, ნუ აუკრძალავთ თქვენს შვილს სიცივეში, სითბოში ან სადმე, სხვა პირობებში სველი თმით გასვლას. ეს არანაირი სახის დაავადებასთან არ ასოცირდება.
ყველაზე მეტი, რაც ამ ფაქტმა შეიძლება გამოიწვიოს, ეს დისკომფორტია, რაც შეიძლება გამოვლინდეს იმით, რომ ბავშვს, მოზარდს, ზრდასრულ ადამიანს თავის არეში მსუბუქი ტკივილი ჰქონდეს ისიც იმიტომ, რომ სიცივეში სისხლძარღვები ვიწროვდება – მეტი არაფერი.
გიორგი ღოღობერიძე ასევე განმარტავს, რამდენად სწორია სველი თმით დაძინება:
– სველი თმით დაძინება სასურველი ნამდვილად არ არის. ამას მარტივი ახსნა აქვს. სველი, ნესტიანი გარემო ბაქტერიებისა და სოკოების გამრავლებისთვის ხელსაყრელ პირობებს ქმნის. მაგალითად, თუ აბაზანაში ორთქლს დააგუბებთ და იმ კედლებს არ გაწმენდთ, შენიშნავთ, რომ რამდენიმე კვირაში ის კედლები სოკოთი დაიფარება. ჩვენს შემთხვევაშიც ზუსტად ასე ხდება. როცა თავს დავიბანთ და სველი თმითვე ვწვებით, სველ თმაში სოკოების რაოდენობა იმატებს და იმატებს. თუ ეს ერთჯერადი შემთხვევაა, არა უშავს, მაგრამ თუ რეგულარულად, ყოველდღიურად ხდება, ამ შემთხვევაში შეიძლება თავად ბალიშიც სოკოების მატარებელი იყოს და დროთა განმავლობაში კანის სოკოვანი ინფექციები გამოიწვიოს. ასე რომ, თუ თავის დაბანა საღამოობით გიყვართ, ჩემი რჩევა იქნება, ეს დაძინებამდე 1-2 საათით ადრე გაკეთოთ იმიტომ, რომ ასეთ დროს თმა ბუნებრივად გაშრობას მოასწრებს და აბსოლუტურად უსაფრთხო იქნება უშუალოდ თმისთვისაც და თავის არეში არსებული კანისთვისაც.
