გუშინ „დინამო არენაზე“, ერთა ლიგის პლეი-ოფში, საქართველომ სომხეთი დაამარცხა (ორი მატჩის ჯამში 9:1) და B ლიგაში ადგილი შეინარჩუნა.
თამაშის დასრულების შემდეგ, ქართველ გულშემატკივართა ნაწილი მოედანზე შეცვივდა, რასაც სომეხი სტუმრების შეურაცხყოფა მოჰყვა.
აღნიშნულს თბილისის მერი, ნაკრების ყოფილი კაპიტანი, კახი კალაძე გამოეხმაურა.
„ცხადია, რაც მოხდა, არ იყო სასიამოვნო, მაგრამ ეს ფეხბურთია და ფეხბურთში მსგავსი ფაქტები ხდება – გულშემატკივრები ერთმანეთს უპირისპირდებიან. ეს არ ნიშნავს იმას, რომ ჩვენს მეგობარ სომხებთან რაიმე დაძაბულობა გვაქვს. ცუდი იყო ფაქტი, მაგრამ, ეს რა თქმა უნდა, არ და ვერ აისახება ჩვენს მეგობარ დებთან და ძმებთან ურთიერთობაზე.
არც ის ფაქტი იყო ლამაზი, გულშემატკივარი მოედანზე რომ შევიდა, თუმცა, ფეხბურთს ახასიათებს მსგავსი მომენტები“, – თქვა კალაძემ.
გუშინ მომხდარ ინციდენტს დიდი გამოხმაურება მოჰყვა როგორც საქართველოში, ისე სომხეთში.
სავარაუდოა, რომ მომხდარის გამო, UEFA-მ საქართველო დასაჯოს.
