კესარია აბრამიძის მეგობარი „რადიო თავისუფლებასთან“ ინტერვიუში იხსენებს, როგორ ეწინააღმდეგებოდნენ მეგობრები, კესოსა და ბექა ჯაიანის ურთიერთობას.
მისი თქმით, კესო მოძალადე პარტნიორს არაერთხელ დაშორდა, მაგრამ ის სახლში უვარდებოდა.
„ვიცი, რომ კესოს გაცნობიდან რამდენიმე თვეში დაიწყო ეჭვიანობა. ჩვენ, მისი ყველა მეგობარი ამ ურთიერთობის წინააღმდეგი ვიყავით, როცა გამოვლინდა რომ იყო ეჭვიანი მოძალადე.
გაზაფხულზე ვნახეთ, რომ ეს ადამიანი დემონსტრანტების ცემაში მონაწილეობდა („აგენტების კანონის“ საწინააღმდეგო აქციები თბილისში აპრილ-მაისში მიმდინარეობდა – რ.თ) ამ ფაქტის მერე კესო ძალიან გაერიდა, არ უნდოდა გაეგოთ, რომ ასეთ მოძალადე ადამიანთან ჰქონდა ურთიერთობა, გარკვეული პერიოდი თურქეთში იყო წასული, იქაც ემუქრებოდა.
რომ ჩამოვიდა, სახლში რამდენჯერმე მიუვარდა, თვითონ კესო არ იყო სახლში და მეზობლებმა დაინახეს როგორ ანგრევდა კარს. არ ვიცი როგორ დაემართა, ასეთი გამოცდილი იყო, თავსაც იცავდა. თვითონ კი ასე ფუთავდა, რომ ეს იყო ტოქსიკური ურთიერთობა მაგრამ ალბათ, ტოქსიკურზე მეტი იყო, ბოლო ფაქტი რომ მომიყვა, მაგის მერე პარასკევს ვესაუბრე და მაშინ მითხრა დავასრულე ურთიერთობაო, მერე გუშინ წინ (17 სექტემბერს) ისევ მისულა სახლში და მე რომ გავიგე ეს ამბავი, შევედი მის გვერდზე და ვნახე ეს დადებული სტორი, მივხვდი რომ ისევ ერთად იყვნენ“, – ამბობს იაკობ მამულია. ის გულისხმობს კესარია აბრამიძის სოციალურ ქსელში გამოქვეყნებულ ფოტოს, რომელშიც ის ჩანს სავარაუდოდ მკვლელობაში ბრალდებულთან ერთად.
იაკობ მამულია რადიო თავისუფლებას ეუბნება, რომ რამდენადაც მისთვისაა ცნობილი კესარია მის მიმართ მუქარისა და ძალადობის შესახებ პოლიციას არ ატყობინებდა „შიშის გამო“. „ის [კესარია] არის, ცალსახად, ქვეყანაში ძალადობის წახალისების მსხვერპლი“, – ამბობს მოკლული კესარია აბრამიძის მეგობარი.
