როგორც ცნობილია, აშშ-ის პრეზიდენტი დონალდ ტრამპი, რომელმაც ეს პოსტი მეორე ვადით ახლახან დაიკავა, მრავალი კონსერვატიული ინიციატივით გამოვიდა.
როგორც აღმოჩნდა, პირველი ლედი, მელანია ტრამპი მას ყველაფერში არ ეთანხმება. ის იმ ქალების რიცხვს შეუერთდა, რომლებიც აბორტის უფლებას მხარს უჭერენ და ქმრის, დონალდ ტრამპის საწინააღმდეგო განცხადება გააკეთა.
გავრცელებულ ვიდეორგოლში მელანია ტრამპი ამბობს, რომ მხარს უჭერს ქალების უფლებებს, რომლებიც მათ დაბადებიდან აქვთ მინიჭებული.
მელანიას ეს პოზიცია სრულად ეწინააღმდეგება დონალდ ტრამპის აზრს ამ საკითხთან დაკავშირებით. დონალდ ტრამპისთვის ფაქტობრივად, საარჩევნო კამპანიის ნაწილი იყო აბორტის უფლების შეზღუდვა.
„არ არსებობს კომპრომისის ადგილი, როდესაც საქმე ეხება იმ არსებით უფლებას, რომელსაც ყველა ქალი ფლობს დაბადებიდან – ეს არის ინდივიდუალური თავისუფლება”, – ამბობს მელანია ტრამპი.
ამასთან, ყოფილი პირველი ლედი თავის მემუარებში წერს:
„აუცილებელია გარანტირებული იყოს, რომ ქალებს აქვთ უფლება თვითონ მიიღონ გადაწყვეტილება შვილების გაჩენის შესახებ, მათივე რწმენის საფუძველზე, მთავრობის მხრიდან ყოველგვარი ჩარევისა და ზეწოლის გარეშე.
რატომ უნდა ჰქონდეს ვინმეს უფლება, გარდა თავად ქალისა, განსაზღვროს როგორ მოექცევა ის საკუთარ სხეულს? ქალის ფუნდამენტური უფლებაა შეწყვიტოს ორსულობა, თუ მას სურს“, – წერს მელანია ტრამპი.
