იაშვილის სახელობის ბავშვთა ცენტრალური საავადმყოფოს სამედიცინო დირექტორი ივანე ჩხაიძე მოსახლეობას ღორის გრიპის გავრცელების შესახებ აფრთხილებს.
მისი თქმით, ბოლო ორი კვირის განმავლობაში ქვეყანაში გრიპის გავრცელების მაჩვენებელი გაორმაგდა, ყველაზე მეტად კი ჭარბობს სწორედ ე.წ. ღორის გრიპის შემთხვევები ჭარბობს.
„44-ე კვირიდან ფიქსირდება საქართველოში გრიპის შემთხვევები, თუმცა ძალიან მნიშვნელოვანია, რომ ბოლო 3 კვირის განმავლობაში ეს მონაცემები აღმავალ მრუდზეა. გვაქვს მოლოდინი, რომ ეს მატება შემდეგ კვირებშიც გაგრძელდება. ასევე, გვაქვს მოლოდინი, რომ იანვრის თვე იქნება გამორჩეული, პიკის მოლოდინი დეკემბერ-იანვრის პერიოდში გვაქვს.
თუ წინა კვირებში ძირითადად A ტიპის ვირუსი გვქონდა, ახლა გამოჩნდა B ტიპის ვირუსი. 25%-დან 2% არის B ტიპის. ყველაზე მეტი მაინც არის H1N1, კარგად ცნობილი ღორის გრიპი და შედარებით ნაკლებია H3N2 ტიპის ვირუსი. ყველაზე მეტი შემთხვევა ფიქსირდება H1N1 ვირუსიდან გამომდინარე. ბოლო 2 კვირაში გრიპის მაჩვენებლები გაორმაგდა, ალბათ გარკვეულ როლს ამინდის ცვლილებაც თამაშობს. გვაქვს მოლოდინი, რომ 51-ე კვირა უფრო აქტიური იქნება”, – განაცხადა ჩხაიძემ.
როგორც ჩხაიძე განმარტავს, შემთხვევების 30-40%-ში ვითარდება ფილტვების ანთება.
“ძალიან ბევრი ბავშვი წევს იაშვილის კლინიკაში ფილტვების ანთებით, ბევრ ბავშვთან დაგვჭირდა ანტივირუსული პრეპარატის გამოყენება. ჰოსპიტალიზაციის მაჩვენებელიც გაზრდილია გრიპის შემთხვევების მატების ხარჯზე”, – ამბობს ის.
