,,ევროვიზია 2025”-ზე საქართველოს წარმომადგენელი ევროვიზიის მეორე ნახევარფინალში, 15 მაისს იმღერებს. წელს განსაკუთრებული კონკურენცია გაიმართა ცნობილ ქართველ მომღერლებს შორის. საკონკურსო სიმღერა ჰქონდა გაგზავნილი თათია კობალაძეს, რომელიც ბოლო თვეებია სიმსივნეს ებრძვის და კომპოზიტორმა მაიკო კაჭკაჭიშვილმა სპეციალურად მისთვის და ამ კონკურისთვის დაწერა სიმღერა.
,,ევროვიზიაზე” საქართველოს წარდგენისთვის იბრძოდა ასევე შტატებში მცხოვრები ქართველი შემსრულებელი ნინი ბრეგვაძეც. ვინ წარდგება წელს საქართველოს სახელით ინფორმაციას “პირველი არხი” 15 მარტამდე გაავრცელებს.
თუმცა, გუშინ, თათია კობალაძემ ფეისბუქის პირად გვერდზე ლაივი ჩართო, სადაც კონკურენციასა და კონკურსის გამარჯვებულ სიმღერაზე ისაუბრა. მისი თქმით, წელს, “ევროვიზიაზე” საქართველოს მომღერალი მარიამ შენგელია წარადგენს. ინფორმაცია ჯერ ოფიციალურად არ გავრცელებულა, თუმცა როგორც შემსრულებელი ამბობს, ყველაფერი გადაწყვეტილია.
,,ოფიციალურ ინფორმაციას დავასწრებ და გეტყვით, რომ წელს, “ევროვიზიას” საქართველოდან წარადგენს მარიამ შენგელია, ქეთი გაბისიანის სიმღერით „ანი ბანი”. მარიამს უდიდეს წარმატებას ვუსურვებ როგორც ქართველს და ასე იქნებოდა ვინც არ უნდა ყოფილიყო.
ჩემი სიმღერის ავტორი იყო უნიჭიერესი გოგო, მაიკო კაჭკაჭიშვილი, რომელიც მშვიდად ელოდება პასუხს კითხვაზე, ვინ შეაფასა სიმღერა და ვინ გადაწყვიტა, რომ მისი სიმღერა არ უნდა გასულიყო “ევროვიზიაზე”. ამ კონკურსში იმარჯვებს სიმღერა და არა შემსრულებელი.
მაიკო ელოდება პასუხს, ვინ იჯდა კომისიაში ვინ გადაწყვიტა, რომ მისი სიმღერა არ უნდა გასულიყო. დიდი ხანია ვიცი, მაგრამ ხმამაღლა არ ვამბობდი, რომ ეს სიმღერა იყო მარიამის სიმღერა, რომელიც უნდა გაეტანათ. ასევე დადიოდა ჭორები, რომ მარიამი არის გადაწყვეტილი და აზრი არ აქვს. რამდენად მომგებიანია სიმღერა „ანი ბანი” „ევროვიზიისთვის” ეს არ ვიცით და ვნახავთ. მე ვფიქრობ, რომ არ უნდა გავასაჯაროო სიმღერა, რომელიც გავგზავნე, რადგან შემდეგ წელს, მზად იყოს ეს სიმღერა. მუსიკის ავტორია მაიკო კაჭკაჭიშვილი, ტექსტის ავტორი ბიბი კვაჭაძე.
სუბიექტური ვარ თუ ობიექტური, მესიჯი რომელიც ჩემს სიმღერაში იდო, ეს იყო მოგების გარანტი. თუ კი ვინმეს უნდოდა, რომ შანსი ჰქონოდა საქართველოს გამარჯვების უნდა წასულიყო ეს სიმღერა. რა თქმა უნდა გული დამწყდა, მაგრამ ეს არ არის ჩემთვის პირველი შემთხვევა. ამის გამო, დეპრესიაში ჩავარდნას არ ვაპირებ, ჩემთვის მისაღებია ყველანაირი გადაწყვეტილება, თუმცა აქვე ვამბობ, რომ ის მესიჯი, რომელიც ჩვენ გვქონდა იყო გამარჯვების გარანტია.
ახლა ის დროა, დაველოდოთ ევროვიზიას, წარმატებები ვუსურვოთ მარიამს და დაველოდოთ პოპკორნით ნახევარფინალს. ძალიან მიყვარს ჩემი ქვეყანა და როცა გაქვს მესიჯი, რომლის გატანაც მინდოდა, რატომაც არა, თუ ვინმეს მივცემდი სტიმულს, რომ სიმსივნე არ არის განაჩენი და ჩემს ქვეყანას წარმატებას მოვუტანდი, რატომა არა. ბოლო წამამდე ვიბრძოდი, რომ ყოფილიყო სამართლიანი გადაწყვეტილება, მაგრამ…
ის ხალხი ვინც მწერდა, ლოგინში უნდა იწვე და ჯანმრთელობას მიხედეო, კარგით ხალხნო, ლოგინში ვიწვები და მომავალ წელს აუცილებლად წავალ „ევროვიზიაზე”.
წყარო: ambebi.ge
