თბილისის საქალაქო სასამართლომ მომღერალი აჩიკო მეფარიძე დამნაშავედ ცნო. მოსამართლის გადაწყვეტილებით, მას ჯარიმის სახით 10 000 ლარი დაეკისრა.
მეფარიძეს ბრალი სისხლის სამართლის კოდექსის 126-ე მუხლით და 151-ე მუხლის პირველი ნაწილით წარედგინა, რაც ძალადობასა და სიცოცხლის მოსპობის მუქარას გულისხმობს.
დაცვის მხარე სასამართლოს გამოტანილ განაჩენს არ ეთანხმება. ადვოკატის განცხადებით, გადაწყვეტილებას სააპელაციო წესით გაასაჩივრებენ.
ადვოკატის თქმით, დაზარალებული პროვოკაციულად ცდილობდა მეფარიძის „წამოკიდებას“.
მისივე განმარტებით, მეფარიძეს მისთვის დაზიანების მიყენების განზრახვა რომ ჰქონოდა, მანქანიდან გადმოსვლის საშუალებას მისცემდა.
ხერხეულიძის თქმით, დაზარალებულის ჩვენების გარდა, მეფარიძის მხრიდან მუქარის განხორციელება სხვა მტკიცებულებებით ვერ დასტურდება. მისივე განმარტებით, ვერ გამოიკვეთა და ვერ დადასტურდა, თუ რატომ სურდა ბრალდებულს მსხვერპლის შეშინება.
“მახინჯოო” უთხრა, მაგრამ ამ სიტყვის თქმის გამო, პირის სისხლის სამართლებრივ პასუხისგებაში მიცემა შეუძლებელია”, – განაცხადა ხერხეულიძემ.
ხოლო როგორ დაზარალებული ლელა ჯუღელი აცხადებს, მას მანქანის პარკირების დროს მომღერალი ფიზიკურად გაუსწორდა, ამასთან სიტყვიერი შეურაცხყოფაც მიაყენა.
„შვილის სახლთან, მიმდებარე ტერიტორიაზე, მანქანის დაპარკინგებას ვცდილობდი, თუმცა, როგორც ხდება ხოლმე, გარშემო უამრავი მანქანა იდგა, გაურკვევლობა იყო და შევფერხდი. უცებ დავინახე, მოწინააღმდეგე მხრიდან მოდის უზარმაზარი ჯიპი და მესმის როგორც მლანძღავს მძღოლი. კარგი ამინდი იყო, ფანჯარა ჩაწეული მქონდა და ვუპასუხე, შენ ვინ გეკითხება- მეთქი. საბოლოოდ, იმ ტერიტორიაზე მანქანა ვერ გავაჩერე და დაახლოებით 5-7 წუთში, იქვე, 50 მეტრის რადიუსში მოვახერხე მანქანის გაჩერება. ის ის იყო, მანქანიდან უნდა გადმოვსულიყავი, რომ უცებ მანქანასთან მოდის ამხელა კაცი და უშვერი სიტყვებით მიწყებს ლანძღვას და ფეხს ურტყამს მანქანას. ფანჯრის აწევას ვერ ვასწრებ და ჯერ მუშტს მირტყამს სახეში, შემდეგ სილას და გარბის. ეს ადამიანი ამედევნა და როგორც კი გავაჩერე მანქანა, მოვარდა, უშვერი სიტყვებით გამლანძღა და თან ფიზიკურად იძალადა“, – ამბობს ის.
შემთხვევა 2022 წლის 7 აპრილს, ჭავჭავაძის 33-ში მოხდა.
აჩიკო მეფარიძეს ბრალი სისხლის სამართლის კოდექსის 126-ე მუხლით და 151-ე მუხლის პირველი ნაწილით წარედგინა, რაც ძალადობასა და სიცოცხლის მოსპობის მუქარას გულისხმობს.
