ბოლო პერიოდში გახშირებული ავარიები და ტრაგიკული შემთხვევები, კანონმდებლობის გამკაცრების მიზეზი გახდა. პარლამენტმა სამი მოსმენით უკვე დაამტკიცა ცვლილებები, რომელიც ითვალისწინებს ჯარიმების ზრდას, როგორც მძღოლებისთვის, ისე ქვეითებისთვის. მხოლოდ 2025 წლის პირველ კვარტალში ავტოსაგზაო შემთხვევებს უკვე 112 ადამიანი ემსხვერპლა. მათი უმეტესობა ქვეითად მოსიარულე იყო.
საკანონმდებლო ცვლილებებით, საგზაო ნიშნების უგულებელყოფისთვის ქვეითები 10 ლარის ნაცვლად, ახლა 50 ლარით დაჯარიმდებიან. ავტომაგისტრალზე მოძრაობის წესების დარღვევა კი გამოიწვევს მათ დაჯარიმებას 100 ლარის ოდენობით. განმეორების შემთხვევაში ფულადი სანქციები ორმაგდება. კანონმდებლობის გამკაცრება ლოგიკური და მისაღებია მოქალაქეებისთვის.
ცვლილებები ავტომობილების მიერ ხელოვნურად გამოწვეულ ხმაურსაც არეგულირებს. 100 ლარის ნაცვლად 200 ლარით დაჯარიმდება მძღოლი, რომელიც ავტომობილს ხელოვნურად გადაკეთებული მაყუჩით მართავს. ჯარიმები იზრდება ე.წ. დრიფტის შემთხვევაშიც. 2000 ლარიანი საჯარიმო ქვითარი გადაეცემა მძღოლს, რომელიც სხვა მძღოლების შეცდომაში შეყვანის მიზნით დადგენილი ფერისგან განსხვავებული ციმციმით და სიგნალით გადაადგილდება.
გამკაცრებული კანონმდებლობის პარალელურად აღსრულების გამკაცრებას ელოდებიან საგზაო უსაფრთხოების ექსპერტები. სპეციალისტები ამბობენ, რომ ახალი ჯარიმების შესახებ მოქალაქეების ინფორმირება დროულად უნდა მოხდეს.
საკანონმდებლო ცვლილებები პარლამენტმა უკვე დაამტკიცა. დოკუმენტს პრეზიდენტი მომავალ კვირას მოაწერს ხელს და კანონიც ოფიციალურად ამოქმედდება.
