ბრიტანელ მოზარდს, რომელმაც თავისი ოჯახის სამი წევრი მოკლა, 49 წლით თავისუფლების აღკვეთა მიუსაჯეს. 19 წლის ნიკოლას პროსპერმა, 2024 წლის 13 სექტემბერს, საკუთარ სახლში ცეცხლსასროლი იარაღით მოკლა დედა, 48 წლის ჯულიანა ფალკონი, 16 წლის ძმა, კაილი და 13 წლის და, ჟიზელი.
დანაშაულის ადგილზე პოლიცია მეზობელმა გამოიძახა. სამართალდამცავები ბინაში ძალის გამოყენებით შევიდნენ.
უმცროსი დის ცხედარი სასადილო მაგიდის ქვეშ იპოვეს, ვარაუდობენ, რომ გოგონა დამალვას ცდილობდა. 16 წლის კაილი სამზარეულოში იპოვეს, მას დანით 100-ზე მეტი ჭრილობა ჰქონდა მიყენებული.
დამნაშავე მკვლელობიდან რამდენიმე საათში, სკოლასთან ახლოს დააკავეს. მოზარდმა პოლიციას განუცხადა, რომ წმინდა ჯოზეფის დაწყებითი სკოლის 30 მოსწავლის მოკვლასაც გეგმავდა. ინტერნეტში პროსპერის დაკავების კადრებიც ვრცელდება.
“თქვენი ამბიცია იყო ცნობადობა. გინდოდათ, რომ 21-ე საუკუნის ყველაზე ცნობილი მკვლელის სახელი მოგეპოვებინათ. ამ საშინელ ამბიციას თქვენი დედის, დისა და ძმის სიცოცხლეც ემსხვერპლა” – განაცხადა მოსამართლე ჯასტის ჩიმა-გრაბმა. პროკურორმა დანაშაულს “21-ე საუკუნის უდიდესი ხოცვა-ჟლეტა“ უწოდა.
ფსიქიატრის განცხადებით, პროსპერს “ემპათიისა და სინანულის უკიდურესი ნაკლებობა” აქვს, რაც ფსიქოპათიურ ტენდენციებს მიეკუთვნება. მისივე თქმით, ბრალდებული ავლენდა აუტისტური სპექტრის აშლილობის (ASD) ყველა სიმპტომს, მაგრამ დიაგნოზი არ დაუდგინდა.
