19 წლის პარატაეკვონდოისტი ანა ჯაფარიძე ზაფხულში პარიზის ოლიმპიადის მედალოსანი გახდა.
მან ერთ-ერთ ტელეეთერში ხელის დაკარგვის და პარატაიკვანდოში მოხვედრის ისტორია გაიხსენა.
„16 წლის ვიყავი, როდესაც ხელის ამპუტაცია დამჭირდა. საწარმოო უთოში დამეწვა ხელი და ერთი კვირა მაკვირდებოდნენ საავადმყოფოში. გადაწყვეტილება არ ჰქონდათ მიღებული ამპუტაციასთან დაკავშირებით და მე ბოლო წამამდე ვფიქრობდი, რომ არ დამჭირდებოდა. აზრადაც არ გამივლია სიმართლე რომ გითხრათ, რომ ხელის ამპუტაცია დამჭირდებოდა. მაგრამ მოხდა ისე, რომ ეს ყველაფერი საჭირო გახდა და შემდეგ უკვე დაიწყო ეს ჩემი მოგზაურობა პარატაიკვანდო სფეროში. დედაჩემის დიდი ინიციატივა იყო, რომ დამეწყო სპორტი.
საერთოდ, ძალიან აქტიური ბავშვი ვიყავი, ტანვარჯიშზეც დავდიოდი, ცეკვებზეც, ბალეტზეც ვიარე ცოტა ხანი. ასე რომ, ჩემთვის ფიზიკური აქტივობა ახალი არ იყო. მაგრამ როგორც კი მოვედი, მივხვდი, რომ ძალიან რთულ და მძიმე საქმესთან იყო დაკავშირებული ეს ყველაფერი, მაგრამ აქ ვიპოვე ჩემი თავი და მივხვდი, რომ ეს ჩემი სფერო იქნებოდა“, – ამბობს ანა ჯაფარიძე.
