მომღერალი ნოდიკო ტატიშვილი “ტვ პირველის“ ეთერში აცხადებდა – „როგორ შეიძლება ახალ წელს სცენაზე დავდე და ვიმღერო, როცა ვიცი, რომ უდანაშაულო ხალხი ციხეში ზის?“.
მეორე დღეს კი ტელეკომპანია “იმედმა” გაავრცელა ქარდი, სადაც წერდა, რომ 31 დეკემბრის ღამეს, ტატიშვილი რესტორან BEG CHEFS-ში იმღერებს.
გავრცელებულ ქარდს, ნოდიკო სოციალურ ქსელში გამოეხმაურა.
“ტელეკომპანია “იმედო” უკვე ისეთი სამარცხვინო ხარ, რაზე გელაპარაკო არ ვიცი.
მერე რომ დაგახურავენ თავზე გწყინთ! ეს კონცერტი იყო დაგეგმილი, რომელიც გაუქმებულია უკვე დიდი ხანია! ეს აფიშა ვინ და რატომ დადო არ ვიცი, თქვენ გეცოდინებათ.
ჩემს ნაცბობ-ახლობლებს მოგმართავთ, მანდ ვინც მუშაობთ, ამ სამარცხვინო ტყუილზე შეგიძლიათ პასუხი მოსთხოვოთ თქვენს ხელმძღვანელობას?” – დაწერა ტატიშვილმა.
მალევე მომღერლის მიერ გამოქვეყნებულ განცხადებას, რესტორნის ბოდიში მოჰყვა.
“ბოდიშს ვუხდით მომღერალ ნოდიკო ტატიშვილს შეცდომის გამო, რომელზეც ჩვენი რესტორნის ადმინისტრაციაა პასუხისმგებელი. მომღერალმა რამდენიმე კვირით ადრე გაგვაფრთხილა, რომ საახალწლო კონცერტში არ მიიღებდა მონაწილეობას ქვეყანაში შექმნილი ვითარებიდან გამომდინარე.
აფიშა რომელიც ვრცელდება სოციალურ მედიაში ჩვენი შეცდომის შედეგია და ძალიან ვწუხვართ ამოს გამო. კიდევ ერთხელ ბოდიშს ვუხდით მომღერალს!“ – ვკითხულობთ განცხადებაში.
შეგახსენებთ, რომ ნოდიკო ტატიშვილი დეკემბერში რუსთაველის გამზირზე მიმდინარე პროტესტს გულშემატკივრობს და 27 დეკემბერს მუსიკოსებისა და მსმენელების მარშში მონაწილეობდა.
“ამდენმა აქციებმა და მარშებმა ცხადყო, რომ 1.120.000 ამომრჩეველს ხმა “ქართული ოცნებისთვის” არ მიუცია! ეს ისედაც ვიცოდით, მაგრამ მაინც… უჰ, როგორ მიყვარხარ, ჩემო საქართველო“ – წერს, ერთ-ერთ ბოლო სტატუსში მომღერალი.
რესტორნის მიერ გავრცელებულ აფიშაში, ტატიშვილთან ერთად ბათუმელი მომღერალი ავთო აბესლამიძეა მითითებული. ამ თემაზე მომღერალს განცხადება არ გაუვრცელებია, თუმცა სოციალურ ქსელში წერს, რომ ბათუმში გალა-კონცერტზე მონაწილეობაზე უარი თქვა, თუმცა სხვებს წარმატებას უსურვებს და ასევე მადლობა უხდის სოფო ხალვაშს, რომელიც ბათუმის მერის მოადგილის პოზიციაზე მუშაობს.
მოგესალმებით ამ პოსტით ვიტყვი ჩემს სათქმელს და გავცემ პასუხს ყველა აქამდე დასმულ შეკითხვას არ ვთვლი , რომ 31-ში საახალწლო გალა კონცერტში , ჩემი მონაწილეობის მიღება იქნება სწორი..
ეს ჩემი პოზიციაა. მაგრამ, აქვე გავუსვამ ხაზს იმას , რომ ყველა ის მონაწილე, მუსიკოსი თუ მომღერალი ვინც მონაწილეობას იღებს კონცერტში… ჩემი კოლეგები არიან, უმრავლესობა ჩემი მეგობრები არიან და ჩემი საყვარელი ქალაქის ბათუმის შვილები… მათ რა თქმა უნდა ვუსურვებ წარმატებას. და ჩვენ მუსიკოსები ვიქნებით ის ადამიანები ვინც ჩვენს წვლილს შევიტანთ და მუსიკით გავაერთიანებთ მალე ორად გაყოფილ აზრს საქართველოს ისე არაფერი უხდება , როგორც ერთიანობა.
სოფო, შენ კიდევ დიდი მადლობა, ყველა მუსიკოსის სახელით რომ, ყოველთვის ხარ მათ გვერდით და კი იცი მიყვარხარ.“ – წერს აბესლამიძე.
