„ოჯახს 6 შვილი ჰყავს დაღუპული, ორი წლის წინ ახალშობილი ბიჭი ილია გარდაეცვალათ” – ამბობს ოკუპირებული აფხაზეთის სოფელ საბერიოში 5 იანვარს ხანძრის შედეგად დაღუპული ხუთი მცირეწლოვანი გოგონას ოჯახის ნათესავი მამუკა ძანძავა.
მისი თქმით, ბავშვებს ახალგაზრდა, ძალიან ყურადღებიანი მშობლები ჰყავდათ.
„ბავშვების მამა, ვიტალი ჩემი ბიძაშვილია. ზუგდიდში, სოფელ ოქტომბერში დევნილთა დასახლებაა, ყოფილი პროფტექნიკუმის ორი 5-სართულიანი შენობიდან ერთ-ერთში ცხოვრობდნენ. 5 ბავშვი და დედ-მამა ცხოვრობდნენ ერთოთახიანში, ისიც სხვისი ბინაა. ორი ბავშვი საჯარო სკოლაში დადიოდა, პირველ და მეორე კლასებში. ორი ბავშვი მოსაზღვრე სოფლის, ახალი კახათის ბაღში დადიოდა, რადგან ჩვენთან ბაღი არ არის, ახლა აშენებენ, მეხუთე ბავშვი კი 8 თვის იყო.
დედა, ქრისტინა სორდია, 24 წლისაა, მამა – 31 წლის, „ენგურჰესზე” მუშაობს, კვირაში მგონი, 2 დღეს, სხვა დროს ფიზიკურად შრომობს. მშრომელი ოჯახია, ძალიან ხელმოკლედ ცხოვრობდნენ. სოციალურ დახმარებას იღებდნენ, 1000 სარეიტინგო ქულა ჰქონდათ. მიუხედავად სიღარიბისა, ბავშვები ძალიან მოვლილები ჰყავდათ, არაფერს აკლებდნენ. ძალიან კარგი მშობლები იყვნენ. საბერიოში ვიტალის დედა ცხოვრობს და ვიტალი ბავშვებით ძალიან ხშირად დადიოდა. ახლაც, სანამ არდადეგები დაიწყებოდა, მამამ წაიყვანა ბავშვები ბებიასთან. დედას თირკმელების პრობლემა ჰქონდა და ზუგდიდში საავადმყოფოში იწვა. მამა მის სანახავად იყო წასული. ამ ოჯახს მეხუთე შვილიც გარდაცვლილი ჰყავს. 2 წლის წინ რამდენიმე კვირის ახალშობილი ბიჭი დაეღუპათ ქუთაისის საავადმყოფოში“, – ამბობს ის.
