ნანუკა ხაზარაძემ გადაცემაში „მარტოობის 15 წუთი“ სტუმრობისას თავის ცხოვრებისეულ ტრავმებზე ისაუბრა:
„ცხოვრებისეულმა ტკივილებმა და ბევრმა სტრესმა ჩამომაყალიბა იმ ადამიანად, ვინც დღეს ვარ. ბავშვობიდან ჩემი ოთახი არ მქონია, პირველად მომეცა საშუალება ჩემი ბუდე მომეწყო. ყველაფერი ჩემს ცხოვრებაში გვიან მოხდა, გარდატეხის ასაკიც კი. გვიან დავღვინდი, 40 წლის მერე.
უცნაურობა მჭირს, ფიზიკურად ავად არასდროს არ ვყოფილვარ. სიცხე არ ვიცი რას ნიშნავს ან ცუდად ყოფნა. აი მენტალურად კი მქონდა პრობლემები – 21 წლის ასაკში „დავიკარგე“, შეტევები მქონდა პანიკური, წნევები. დედაჩემმა ექიმთან გამაქანა, მან კი მითხრა, არაფერი არ დაგემართებაო – ამ სიტყვებმა მიშველა.
სამი თვე წამლებზე ვიყავი. მეორე დარტყმა კი 33 წლის ასაკში მქონდა. მანდაც წამლებით გამოვედი. ჩემზე გარემო არ მოქმედებს, ჩემთვის ყველაზე დიდი მტერია პოსტტრავმული დარტყმა, მაგრამ ვისწავლე ჩემი ემოციების მართვა. ადამიანმა უნდა აპატიო შენს თავს გამოხტომები, ისტერიკა და აი მაშინ დაამყარებ ჰარმონიას საკუთარ თავთან“, – ამბობს ნანუკა ხაზარაძე.
