სამედიცინო ექსპერტიზის დასკვნით, 37 წლის ტრანსგენდერ ქალს, კესარია აბრამიძეს ბექა ჯაიანმა დანით 28 ჭრილობა მიაყენა. ამას გარდა, ბრალდების მხარის განცხადებით, საქმეში აუდიოჩანაწერიც არსებობს, რომელშიც ბექა ჯაიანი მისი ოჯახის ერთ-ერთ წევრს უყვება, თუ როგორ აყენებდა ქალს ფიზიკურ შეურაცხყოფას, თუ ის გაანაწყენებდა.
„ბექა ჯაიანმა კესარია აბრამიძეს მიაყენა 28 ჭრილობა დანის გამოყენებით და სწორედ მიყენებული ჭრილობები არის გარდაცვალების უშუალო მიზეზი. წარმოდგენილი მტკიცებულება დაცვის მხარემ მიიჩნია სადაოდ, რაც ნიშნავს იმას, რომ მოცემულ სისხლის სამართლის საქმეზე დაიკითხება აღნიშნული ექსპერტიზის დასკვნის გამცემი ექსპერტი. ჩვენ მიერ წარდგენილი მტკიცებულებებში გარდა იმისა, რომ მოწმეთა ჩვენებები არსებობს, ასევე ექსპერტიზის დასკვნები, ასევე არსებობს ნეიტრალური მტკიცებულებები, მათ შორის ვიდეო ჩანაწერების სახით, აუდიო ჩანაწერების სახით, წერილობითი მტკიცებულებების სახით, რომლითაც დასტურდება ის გარემოება, რომ ბექა ჯაიანის მიერ ჩადენილი არის განსაკუთრებული სისასტიკით გენდერისა და იდენტობის ნიშნით, შეუწყნარებლობის მოტივით განზრახ მკვლელობა“,– ამბობს პროკურორი.
ადვოკატის თქმით, ბრალდებული განსაკუთრებული სისასტიკით ჩადენილ მკვლელობას არ აღიარებს.
“ბრალდებული განსაკუთრებული სისასტიკით ჩადენილ მკვლელობას და ასევე გენდერის ნიშნით ჩადენილ მკვლელობას არ აღიარებს. ასევე, მეორე ბრალდება რაც არის – სისტემატური შეურაცხყოფა და ძალადობას არ აღიარებს,” – აცხადებს ადვოკატი.
კესარია აბრამიძის განსაკუთრებული სისასტიკით, გენდერის ნიშნით განზრახ მკვლელობაში ბრალდებული 26 წლის ბექა ჯაიანი ქუთაისის აეროპორტის მიმდებარე ტერიტორიაზე დააკავეს. მას 16-დან 20 წლამდე ან უვადო პატიმრობა ემუქრება.
წყარო: primetime
