ცოტნე გამსახურდიას მეუღლე, ანა ჯაბაური “კურიერი P.S.-თან” ჰყვება, რომ მისი დედამთილის, მანანა არჩვაძის დაკვეთით და წაქეზებით, მამაკაცი სახელად დავით ერაძე მასზე ფიზიკურ თავდასხმას ამზადებდა.
,,დამელოდე, ლინჩის წესით უნდა გაგასამართლო”;
“სროკზე გამიშვან, მეც ეგ მინდა”,
“შენ რაც დაგემართება, მტერს არ ვუსურვებ”,
“ჩემ გადაკიდებას 8-მეტრიანი გიურზას გადაკიდება გერჩივნა”- ამ შინაარსის მუქარებს იღებდა ანა ჯაბაური მამაკაცისგან.
დავით ერაძე სამართალდამცველებმა ადევნების ბრალდებით დააკავეს. ის ქალს სიცოცხლის მოსპობით ემუქრებოდა და უკვე პენიტენციურ დაწესებულებაშია.
კურიერი ps-ის ცნობით, ის პირველი პრეზიდენტის მეუღლის, მანანა არჩვაძის გარემოცვის წევრი აღმოჩნდა.
სწორედ მანანა არჩვაძის საქმის მასალებში დევს მტკიცებულებები, სადაც ჩანს, რომ ყოფილი პირველი ლედის ახლო გარემოცვის წევრი ანა ჯაბაურს შუბლის გახვრეტით ემუქრება.
იმას, რომ ცოტნე გამსახურდიას მეუღლის მიმართ საფრთხე რეალური იყო, მოწმეების გარდა, ფსიქოლოგიური ექსპერტიზის დასკვნაც ადასტურებს. დოკუმენტი სისხლის სამართლის საქმეში ერთ-ერთი მთავარი მტკიცებულებაა. დასკვნაში ვკითხულობთ, რომ მანანა არჩვაძის გარემოცვის მხრიდან ანა ჯაბაური რეალური საშიშროების წინაშე იდგა.
მანანა არჩვაძის აგრესიული მხარდამჭერების სრული სიმკაცრით დასჯას ითხოვს ზვიად გამსახურდიას ვაჟიც. კონსტანტინე გამსახურდია “კურიერი P.S.-თან” არ გამორიცხავს, რომ ყოფილი პირველი ლედი საკუთარი გარემოცვის წევრებს დანაშაულებრივ დავალებებს აძლევს. ეჭვებს ამყარებს ანა ჯაბაურის მიმართ ადევნება და სიცოცხლის მოსპობის მუქარაც. გამსახურდიას ვაჟი მანანა არჩვაძის მხარდამჭერებს სექტის წევრებად მოიხსენიებს, რომლებიც მზად არიან, ლიდერის ნებისმიერი დავალება შეასრულონ.
“კურიერი P.S.” შეეცადა მანანა არჩვაძესთან დაკავშირებას. ზვიად გამსახურდიას მეუღლემ ბრალდებებზე კომენტარის გაკეთება არ ისურვა. კამერის წინ საუბრისგან თავი შეიკავა მისმა დამ, ლელე არჩვაძემაც, თუმცა ანა ჯაბაურის მიმართ აგრესია ვერც მან დამალა.
ანა ჯაბაურის მიმართ ადევნებასა და მუქარაში მხილებული დავით ერაძე უკვე ორწლიან პატიმრობას იხდის. ეს მისთვის მეხუთე განაჩენია. 55 წლის მამაკაცი, ნარკოტიკების რეალიზაციისა და ძალადობრივი დანაშაულისთვის, წარსულში ოთხჯერ არის გასამართლებული. რა მოტივით მოქმედებდა ამჯერად დამნაშავე? ამ კითხვით საქმის პროკურორს მივმართეთ. ბრალდების მხარე ამბობს, რომ დავით ერაძე ცოტნე გამსახურდიას მეუღლეს გენდერული შეუწყნარებლობის ნიშნით დევნიდა.
დავით ერაძე პენიტენციურ დაწესებულებაში იმყოფება. ანა ჯაბაური ამბობს, რომ ამჟამად თავს უსაფრთხოდ გრძნობს. საკუთარი გამოცდილებიდან გამომდინარე, ქალებს მოუწოდებს, რომ დევნის, ძალადობისა და შევიწროების შესახებ დაუფარავად ისაუბრონ.
ანა ჯაბაური, მე-6 წელია, მძიმე მდგომარეობაში მყოფი ცოტნე გამსახურდიას მეურვეა. პირველი პრეზიდენტის ვაჟი, 2019 წლის დეკემბერში, საცხოვრებელი სახლის მიმდებარე ტერიტორიაზე მძიმედ დაჭრეს. უცხოეთის რამდენიმე კლინიკაში მკურნალობის შემდეგ, ის ამჟამად წეროვნის სარეაბილიტაციო ცენტრში იმყოფება. მოსამართლის გადაწყვეტილებით, მანანა არჩვაძეს შვილის მონახულება და სამედიცინო დოკუმენტაციაზე წვდომა ეკრძალება.
წყარო: რუსთავი 2
