ბოლო დროის ყველაზე ტრენდული და მაღალფასიანი შოკოლადი შესაძლოა, თქვენი ჯანმრთელობისთვის საშიში აღმოჩნდეს. გერმანიაში ჩატარებული ლაბორატორიული კვლევების შედეგად, დუბაის შოკოლადში ობის სოკო და ტრანსცხიმები აღმოაჩინეს.
როგორც გერმანული გავლენიანი გამოცემა “შპიგელი” წერს, ქვეყნის სურსათის უვნებლობის ლაბორატორიაში გაერთიანებულ საამიროების, თურქეთის, ნიდერლანდებისა და გერმანიის 6 მსხვილი მწარმოებლის დუბაის შოკოლადს ჩაუტარდა შემოწმება. კვლევის შედეგად კი, თურქეთიდან და საამიროებიდან იმპორტირებულ ყველაზე ძვირადღირებულ ნიმუშებში აღმოჩნდა: გლიციდიდინის ტოქსინები, რაფინირებული პალმის ზეთი, ობის აფლატოქსინები, მიკოტოქსინები, ტოქსიკური არომატიზატორები და საღებავები. ასევე, არცერთი პროდუქტის ანოტაცია არ იძლევა ინფორმაციას მასში არსებული მძიმე ალერგენების შესახებ.
შემოწმებულ დუბაის შოკოლადის ფილებში აღმოჩენილი დამაბინძურებლები კლასიფიცირებულია, როგორც პოტენციური კანცეროგენები, რაც სიმსივნური დაავადებების მაპროვოცირებელია.
დუბაის შოკოლადი კლასიკური რეცეპტით უნდა შეიცავდეს კაკაოს ცხიმს, ფსტის პასტას, ტახინის ანუ სეზამის პასტას და ცომის ოქროსფერ ძაფებს იგივე კადაიფს. თუ ტკბილეული ხარისხიანი მასალით მზადდება და მომხმარებელს არ აქვს ალერგია ინგრედიენტებზე, ის ადამიანის ჯანმრთელობისთვის საშიში არ არის.
წყარო: რუსთავი 2
