დღეს, 21 აპრილს, 88 წლის ასაკში პაპი ფრანცისკე გარდაიცვალა. ამასთან დაკავშირებით, ვატიკანში დაიწყო დისკუსიები იმის შესახებ, თუ ვინ გახდებოდა მისი მემკვიდრე.
La Stampa შესაძლო კანდიდატებსა და კონკლავის ფავორიტებზე წერს.
გამოცემის ცნობით, ერთ-ერთი მთავარი ფავორიტი, იტალიელი პიეტრო პაროლინია.
ვინ შეიძლება გახდეს ახალი პაპი?
აღნიშნულია, რომ პაროლინი 2013 წლიდან ვატიკანის სახელმწიფო მდივნის თანამდებობას იკავებს. La Stampa-ს სტატიაში ხაზგასმულია, რომ ის გამოცდილი დიპლომატია და ეკლესია მიიჩნევს, რომ პაროლინი სხვადასხვა კათოლიკურ სულებს შორის ბალანსს უზრუნველყოფს.
La Stampa წერს, რომ ასევე მაღალი შანსი, რომ გახდეს ახალი პაპი, აქვს მატეო მარია ზუპის. ის არის ბოლონიის მთავარეპისკოპოსი და იტალიის ეპისკოპოსთა კონფერენციის პრეზიდენტი. გამოცემაში აღნიშნულია, რომ მას სანტ-ეჯიდიოს თემში მუშაობის დიდი გამოცდილება აქვს და ვატიკანი მიიჩნევს, რომ ის შეძლებს ინოვაციური, დიალოგური და პრაგმატული სამწყსო მიდგომის დანერგვას.
გამოცემის ცნობით, კიდევ ერთი კანდიდატი იერუსალიმის ლათინური პატრიარქი პიერბატისტა პიცაბალაა. მიიჩნევა, რომ აღმოსავლეთსა და დასავლეთს შორის ხიდის შექმნის აუცილებლობა არსებობს და პიცაბალას უნარი, ჩაერთოს რელიგიათაშორის დიალოგში, შესაძლოა მისი კანდიდატურის სასარგებლოდ მეტყველებდეს.
გარდა ამისა, ვატიკანი განიხილავს ფილიპინელი ლუის ანტონიო ტეგლეს კანდიდატურას. La Stampa წერს, რომ მისი ქარიზმა ფრანცისკეს მსგავსია – მას შეუძლია გახდეს პაპი, რომელიც მისიონერული და ახალგაზრდა ეკლესიის სიმბოლოა
ფრანცისკეს მემკვიდრე ასევე შეიძლება გახდეს ფრანგი ჟან-მარკ აველინი, მარსელის მთავარეპისკოპოსი. სტატიაში ნათქვამია, რომ ის რელიგიათაშორისი დიალოგის ექსპერტია, განსაკუთრებით ისლამთან დაკავშირებით. გარდა ამისა, აველინი წარმოადგენს ევროპას, რომელიც ღიაა ხმელთაშუა ზღვის მიგრაციისა და კულტურული გამოწვევების მიმართ.
კიდევ ერთი კანდიდატი პორტუგალიელი ხოსე ტოლენტინო მენდონსაა. ის არის პოეტი და თეოლოგი, წამყვანი ინტელექტუალი რწმენის ღია და დიალოგური ხედვით. მისი კულტურული მგრძნობელობა და ინოვაციური პასტორალური მიდგომა მას გამორჩეულ კანდიდატად აქცევს მათთვის, ვინც ტრადიციასა და თანამედროვეობას შორის ხიდს ეძებს.
გამოცემის ცნობით, სხვა კანდიდატები არიან მალტიდან მარიო გრეჩი, უნგრეთიდან პიტერ ერდო, გვინეიდან რობერტ სარა, შვედეთიდან ანდერს არბორელიუსი, მიანმიდან ჩარლზ ბოე, შრი-ლანკიდან მალკოლმ რანჯიტი, კონგოს დემოკრატიული რესპუბლიკიდან ფრიდოლინ ამბონგო ბესუნგუ და ნიდერლანდებიდან ვილემ იაკობუს ეიკი.
