ტელევიზიიდან წამოსვლის შემდეგ ნინი ბადურაშვილი თავით გადაეშვა თავის
ყველაზე საყვარელ საქმიანობაში, რომელიც ამ წლების განმავლობაში, რაც
„იმედში“ მუშაობდა, მეტ-ნაკლებად დაპაუზებული ჰქონდა – ახლახან კლიპი
გადაიღო მაიკო კაჭკაჭიშვილის სიმღერაზე, ჩაწერა ახალი კომპოზიცია დუეტ
„ჯორჯიასთან“ ერთადაც.
ნინი ამბობს, რომ ახლა საკუთარი თავის ძიებაშია…
ნინი, შენი ახალი სიმღერა გამოდის, რომელიც მაიკო კაჭკაჭიშვილს ეკუთვნის.
რაიმე ახალი გამოცდილება თუ მიიღე კლიპის გადაღებისას?
სიმღერა მაიკოსია, სწორად აღნიშნე, ტექსტი ირინა სანიკიძემ დაწერა, არანჟირება
კი ბორიკო შხიანს ეკუთვნის. მე და მაიკოს ძალიან დიდი ხნის მეგობრობა და
თანამშრომლობა გვაკავშირებს და ჩვენთვის ეს ყველაფერი ახალი არ იყო, მაგრამ
ახლებურად მივუდექით თავად პროცესს. ფეხი უნდა აუბა იმას, რაც დღეს ხდება.
ჩვენ როგორი სიმღერებიც გვიყვარდა, ძველი, ის არის თანამედროვე ჟღერადობით.
სიმღერის სახელწოდებაა „სიყვარულის დროა“.
ვფიქრობ, ის ზაფხულს უხდება,
ისევე, როგორც კლიპი, ლევან ყანდაშვილმა და ირაკლი ფიფიამ იმუშავეს მასზე.
ჩავწერეთ „ბრავო რეკორდსში“. მგონია, მხიარული ნამუშევარი გამოვიდა.
