მძიმე ავადმყოფობის შედეგად 61 წლის ასაკში გარდაიცვალა მსახიობი, კოტე მარჯანიშვილის სახელობის პრემიის ლაურეატი მერაბ ბრეკაშვილი.
მერაბ ბრეკაშვილმა თეატრალური ინსტიტუტის დასრულების შემდეგ მშობლიურ ქალაქს მიაშურა და სოხუმის კონსტანტინე გამსახურდიას სახელობის თეატრის მსახიობი გახდა. დევნილობაში კი გარკვეული პერიოდის განმავლობაში აღნიშნული თეატრის ხელმძღვანელიც გახლდათ.
შექმნა არაერთი საინტერესო და დასამახსოვრებელი სახე, რომელთა შორისაც გამორჩეულია აფხაზის როლი გურამ ოდიშარიას პიესაში “ზღვა, რომელიც შორია”, თემურ ჩხეიძის დადგმით.
ცხოვრების ბოლო წლები მსახიობმა მოზარდ მაყურებელთა თეატრს დაუკავშირა შექმნა მნიშვნელოვანი როლები სპექტაკლებში “ამიკო”, “იავნანამ რა ჰქმნა”, “ირინეს ბედნიერება”, “მეფე ლირი თავშესაფარში”, “ჭორიკანა ქალები ” და მრავალი სხვა.
წელს მოზარდ მაყურებელთა თეატრმა გამოსცა მერაბ ბრეკაშვილის 40 წლიანი შემოქმედებითი ცხოვრების ამსახველი ალბომი.
აფხაზეთის საინფორმაციო-ანალიტიკური ცენტრი უსამძიმრებს მსახიობის ოჯახის წევრებს, კოლეგებსა და მაყურებელს.
