,,დღეს ახალგაზრდა კაცის სიკვდილს შევესწარით, გულის მასაჟს უკეთებდნენ მონაცვლეობით თურმე საათზე მეტ ხანს”, – რა მოხდა აბუდელაურის ტბებზე?

სოციალური ქსელის მომხმარებელი ოვანე ნაზღაიძე სამწუხარო ამბავს ავრცელებს:

,,დღეს ახალგაზრდა კაცის სიკვდილს შევესწარით.

ეს მოხდა აბუდელაურის ტბებთან, სადაც ყოველ შაბათ-კვირას ასობით ადგილობრივი თუ უცხოელი ტურისტი მოძრაობს და არც მობილური იჭერს და არც რამე სხვა კომუნიკაციის საშუალება არსებობს.

ბავშვებით ავდიოდით და გზაში შეგვხვდა მცირე ჯგუფი. შორიდანვე შევნიშნე, რომ ერთ-ერთი მათგანი გულის მასაჟს უკეთებდა მწოლიარეს და მოშორებით გავჩერდით, ბავშვები რომ არ შეშინებულიყვნენ.

მოკლედ, ცუდად გამხდარა ვიღაც და ამათ ერთი ქვემოთ გააქციეს დახმარების დასაძახებლად, დანარჩენები გულის მასაჟს უკეთებდნენ მონაცვლეობით თურმე საათზე მეტ ხანს.

ამასობაში გაღმა მშენებარე ობიექტისთვის ვერტმფრენმა მასალის ზიდვა დაიწყო. მიდიოდა წინ და უკან და ჩვენ ხელების ქნევით ვცდილობდით ყურადღების მიქცევას.
სამწუხაროდ უშედეგოდ.
მერე ჩვენ გავაგრძელეთ გზა, რადგან ნელი ტემპით ვმოძრაობდით, არ გვინდოდა დაგვღამებოდა, თან ვხვდებოდი, რომ განწირული იყო..

საბოლოოდ შორიდან შევნიშნეთ, რომ რაღაც ჯგუფი შეიკრიბა და ალბათ ვერტმფრენმაც შეამჩნია. დაჯდა და გადააფრინეს.

მოგვიანებით მანქანებთან რომ დავბრუნდით ვერტმფრენიც შორიახლოს იყო. პილოტებთან მოვიკითხე იმ კაცის ამბავი. გარდაიცვალაო. მეტი ვეღარაფერი გავარკვიე, ეგრევე გამოვბრუნდი :(.

მესმის, რომ მთელ საქართველოს ვერ დაფარავენ მობილური ქსელით, მაგრამ ასეთ პოპულარულ მარშრუტზე, სადაც მართლა უამრავი ადამიანი მოძრაობს, უცილებლად უნდა იყოს რაიმე კავშირის საშუალება.

იმაშიც არ გაუმართლა ამ კაცს, რომ ისეთ ბილიკზე იყო, რომელზეც კანტიკუნტად მოძრაობს ხალხი (თეთრი ტბის მარჯვენა მხრის ბილიკი) და დიდი ჯგუფი არ დაემთხვა, სადაც შეიძლება ექიმი ან გადაუდებელი დახმარების მცოდნეც აღმოჩენილიყო.
არ ვარ დარწმუნებული, რომ სწორად უკეთებდნენ პირველად დახმარებას.

ვინმეს ხომ არ მოგიკრავთ თვალი ინფოსთვის, ვინ იყო და კონკრეტულად რა მიზეზით გარდაიცვალა? ბავშვების გამო ვერც ახლოს მივედით და ვერ გამოვკითხეთ”, – წერს მოქალაქე.