შემზარავი ფაქტი მოხდა ჩოხატაურის მუნიციპალიტეტის ერთ-ერთ სოფელში _ “გურია ნიუსის” ინფორმაციით, 30 წლის კაცმა 14 წლის გოგო გააუპატიურა.
როგორც “გურია ნიუსმა” გაარკვია მე-8 კლასელი გოგონა გუშინ გაუჩინარდა. დახმარებისთვის მშობლებმა სოფელში მუნიციპალიტეტის მერის წარმომადგენლობას მიმართა. როგორც კარგად ინფორმირებული წყარო გვიყვება, არსებობს დაზარალებულსა და ზრდასრულ კაცს შორის სატელეფონო მიმოწერები, სადაც სავარაუდო გაუპატიურების ფაქტი იკვეთება.
“გურია ნიუსის” წყაროს ინფორმაციით, არასრულწლოვანი გოგო სახლში დილით დაბრუნდა.
ჩვენივე წყაროს ინფორმაციით, გოგონა დედასთან ერთად დღეს პოლიციის განყოფილებაში გამოკითხვაზე იმყოფებოდა.
მამაკაცი, სავარაუდოდ, იმერეთიდან არის.
ინფორმაციის გადასამოწმებლად “გურია ნიუსი” სოფელში მერის წარმომადგენელს დაუკავშირდა.
“მე ამ თემასთან დაკავშირებით ვერაფერს გეტყვით, მიმართეთ პრესცენტრს”, _ გვითხრა მერის წარმომადგენელმა.
“გურია ნიუსმა” კომენტარის მისაღებად შსს-ს მიმართა.
უწყების ცნობით, საქმეზე მიმდინარეობს საგამოძიებო მოქმედებები.
“გამოძიება სსკ-ის 137-ე მუხლის მე-4 ნაწილით მიმდინარეობს, რაც წინასწარი შეცნობით, არასრულწლოვნის გაუპატიურებას გულისხმობს”, _ გვითხრეს შსს-ში.
არსებული ინფორმაციით, 30 წლის კაცმა, რომელმაც 14 წლის მოზარდი გააუპატიურა, მიმალვა შეძლო და სამძებრო-საგამოძიებო მოქმედებები ამ დრომდე მიმდინარეობს.
წყარო: გურია ნიუსი
