ქუთაისში დააკავეს ბებია, რომელმაც ორ წლამდე ბავშვი TikTok-ის ლაივში სცემა. გავრცელებული კადრების მიხედვით, ქალი შვილიშვილს ფიზიკურად მას შემდეგ გაუსწორდა, რაც ბავშვმა საჭმლით სავსე თეფშს ხელი ჰკრა.
დაკავებულის შვილი, რომელიც ნაცემი ბავშვის დედაა, TikTok-ის ლაივში დედისთვის გირაოს თანხას აგროვებს. მისი თქმით, მას 3000 ლარი სჭირდება. ლაივის დროს ბავშვის დედას ტელეფონზე დაურეკეს, რის შემდეგაც განაცხადა, რომ მას გირაოს თანხა აღარ სჭირდება და ამჯერად ადვოკატის ფულია საჭირო.
ნაცემი ბავშვის დედა ამბობს, რომ უკვე აქვს 500 ლარი და თუ კიდევ 500 ლარით დაეხმარებიან, ადვოკატის მეშვეობით დედამისის უდანაშაულობას დაამტკიცებენ და ის ციხეს დატოვებს.
მისი თქმით, დედამისი, ნინო, რუსთავის ქალთა კოლონიაშია. ის ასევე აცხადებს, რომ ყველას უჩივლებს დეზინფორმაციის გავრცელებისთვის.
ლაივ ვიდეოში ბავშვის დედა ამბობს, რომ შვილის გაჩენა და ის, რომ დედობა უნდოდა, “არ აპატიეს”. რაც შეეხება ბავშვს, მისივე თქმით, მცირეწლოვანი მასთან იმყოფება და სოციალური მუშაკი “წართმევას არ აპირებს”.
“ცემის ფაქტს ვერ მედავებიან, იმაზე მედავებიან, ნინომ რომ თქვა ვიდეოში – მე დავარტყიო”, – ამბობს დაკავებულის შვილი.
სოციალურ ქსელებში ასევე გავრცელებულია ძალადობის ფაქტის შემდგომი ვიდეო, სადაც ჩანს, რომ მას შემდეგ, რაც ბებია შვილიშვილს ფიზიკურად გაუსწორდა, ბავშვის დედა შემოდის და ქალს ეკითხება, თუ რატომ აქვს ბავშვს ხელი გაწითლებული, რა დროსაც ქალი პასუხობს, რომ “მან დაარტყა”.
გამოძიება სისხლის სამართლის კოდექსის 126-ე მუხლით მიმდინარეობს. პოლიციამ დაკითხვაზე დაიბარა ის მოქალაქე, რომელმაც ძალადობის ამსახველი ვიდეო ჩამოტვირთა და საკუთარ გვერდზე გამოაქვეყნა. სასამართლო პროცესი ხვალ არის დაგეგმილი.
წყარო: ambebi.ge
