21 აპრილს მოსკოვის სასამართლომ მიხეილ ხაჩატურიანი, რომელიც 2018 წელს შვილებმა მოკლეს, დამნაშავედ ცნო სამ ქალიშვილზე ძალადობაში. სასამართლოს დადგენილებით, მიხეილ ხაჩატურიანი დამნაშავედ ცნეს სექსუალიზებულ ძალადობაში, ქალიშვილებისთვის მიყენებულ ფიზიკურ და ფსიქოლოგიურ წამებაში, ასევე თავისი შვილების მონაწილეობით პორნოგრაფიის უკანონოდ დამზადებასა და გავრცელებაში… 7-წლიანი ძიების პროცესში გამოვლენილი გამაოგნებელი დეტალებისა და სულ ახლახან სასამართლოს მიერ მიღებული გადაწყვეტილების შემდეგ, არ გამორიცხავენ, საქმე დაიხუროს და გოგონები გაამართლონ, თუმცა ჯერჯერობით, საქმე კვლავ ღიადაა და გაზაფხულის მერე, გოგონები ისევ განაჩენის მოლოდინში არიან.
ახლა მათ წინასწარ განზრახული მკვლელობისთვის 20 წლით პატიმრობა ემუქრებათ. მას მერე, რაც სასამართლომ მამა დამნაშავედ ცნო ძალადობაში, შანსია, საქმე დაიხუროს ან თავდაცვის მუხლით გადაკვალიფიცირდეს, რაც ორ წლამდე პატიმრობას გულისხმობს.
ძიება უკვე 7 წელია გრძელდება და ამ პერიოდის განმავლობაში გოგონებმა უკვე მოასწრეს წინასწარ პატიმრობაში ყოფნა, მარიამ ფსიქიატრიული მკურნალობაც გაიარა. ახლა სამივე გარეთაა, თუმცა შეზღუდვებით ცხოვრობენ. კომენდანტის საათს იცავენ, გარკვეულ დროს სახლში უნდა იყვნენ. და აკრძალული აქვთ ერთმანეთის ნახვა. ერთადერთი, ვინც მათ აკავშირებთ, დედაა – აურელიას სამივესთან კონტაქტის უფლება აქვს.
