მოსკოვში, ჟულებინის ბულვარზე მდებარე საცხოვრებელ ბინაში 53 წლის ელენა წერეთლის დანაწევრებული ცხედარი იპოვეს.
ქალი, რომელიც ქართველი ბიზნესმენისა და რესტორატორის, მამუკა წერეთლის ყოფილი მეუღლეა, რამდენიმე დღის განმავლობაში დაკარგულად ითვლებოდა.
სამართალდამცველებს მისმა დამ მიმართა, რის შემდეგაც მაშველებმა ბინაში შესვლისას ქალის ცხედარი აივანზე აღმოაჩინეს.
ავტოფარეხში ელენა წერეთლის 19 წლის შვილის, დარია წერეთლის ცხედარიც იპოვეს.
გამოძიების ვერსიით, მკვლელობაში ბრალდებულია საქართველოს მკვიდრი, 47 წლის თეიმურაზ გოგიაშვილი, რომელიც ელენა წერეთლის პარტნიორი იყო და მასთან ერთად ცხოვრობდა.
რუსეთის საგამოძიებო უწყებების ინფორმაციით, სამართალდამცველებმა გოგიაშვილის კვალს ვიდეოსათვალთვალო კამერების ჩანაწერების საფუძველზე მიაკვლიეს.
ეჭვმიტანილი ვორონეჟის ოლქში დააკავეს და მოსკოვში გადაიყვანეს. დაკავების დროს გოგიაშვილთან ერთად იმყოფებოდა 40 წლის ქალიც, რომლის შესაძლო მონაწილეობასაც დანაშაულში გამოძიება ამოწმებს. რუსული მედიის ცნობით, ბრალდებული რუსეთის ბინადრობის უფლებას ფლობდა, ორმაგი მკვლელობის ფაქტზე კი გამოძიება გრძელდება.
