აშშ-ში, კანზასის შტატში ბავშვთა საფეხბურთო მატჩის დროს სატვირთო ავტომობილი მოედანზე შევარდა, დაიღუპა ორი და დაშავდა ათი ადამიანი. ინფორმაციას „როიტერი“ ავრცელებს.
ქალაქ ვიჩიტის პოლიციის ინფორმაციით, დაშავებულები სხვადასხვა სიმძიმის ტრავმებით საავადმყოფოში გადაიყვანეს, დაღუპულია ექვსი წლის ბიჭი და 35 წლის მამაკაცი. პოლიციის ცნობით, სატვირთო ავტომობილს 34 წლის ქალი მართავდა. პოლიციის განცხადებით, ამ დროისთვის ის დაკავებულია. უცნობია, რა გახდა შემთხვევის მიზეზი.
პოლიციის ცნობით, მძღოლის შვილიც იმავე სპორტულ კომპლექსში თამაშობდა ფეხბურთს, თუმცა არა იმ მოედანზე, სადაც შემთხვევა მოხდა. სატვირთო ავტომობილში მძღოლთან ერთად ორი არასრულწლოვანიც იმყოფებოდა.
„დღეს ვიჩიტისთვის უმძიმესი დღეა. ოჯახები სპორტულ კომპლექსში მივიდნენ, რათა შვილების ფეხბურთის თამაშისთვის ეყურებინათ. ვერავინ წარმოიდგენდა, რომ ყველაფერი ასეთი ტრაგედიით დასრულდებოდა“,- განაცხადა ქალაქის მერმა, ლილი ვუმ.
