“ახლა შევიტყვე…პირველად მიწევს საკუთარ თავზე ამის დაწერაც” – რას ამბობს გიორგი კეკელიძე?

მწერალი გიორგი კეკელიძე სოციალურ ქსელში სტატუსს აქვეყნებს:

“ახლა შევიტყვე, რომ თურმე ჩემი ,,შეხედულებების გამო” ერთი-ორი სკოლისთვის ჩემთან შეხვედრის გადადება მოუთხოვია ვიღაცას სადღაც.

სკოლებში სამი მიზეზით დავდივარ – წიგნები მიმაქვს, წიგნიერებაზე ვესაუბრები და ,,თომას ზღაპრების” პატარა მკითხველებს ვხვდები. ცხადია, თვითონ მიწვევენ. საკუთარი თავისთვის არასდროს მიმიცია უფლება გავცდენოდი შეხვედრის მიზანს. ჩემს შეხედულებებს რაც შეეხება, ამაზე მოგეხსენებათ – მაქვს საკუთარი წითელი ხაზი – ეს არის რუსული ოკუპაცია და შესაბამისად – ქვეყნის ადგილი და მომავალი. ეს არის თემა, რომელზეც არასდროს გავჩუმდები.

და პირველად მიწევს საკუთარ თავზე ამის დაწერაც – ალბათ ძალიან ცოტა ადამიანს ჰქონია იმხელა სახალხო სიყვარული, რაც მე შემემთხვა – ყველგან – ქალაქში, სოფელში, მთაში თუ ბარში ადამიანები მხვდებიან ღიმილით და სიხარულით. შეიძლება სულაც დაუმსახურებელია ეს ამბავი ჯერ – მაგრამ ასეა და ჩემი გაუქმების მცდელობა მხოლოდ ტრაგი-კომიკური შეიძლება იყოს. ეგ გამოცდილია უკვე – მათ შორის მავნებელი სასარგებლო იდიოტების მიერაც საკუთარ ტყავზე.

ასობით მასწავლებელი და ათასობით მოსწავლე ითხოვს შეხვედრას. ამიტომაც, დიდი იმედი მაქვს, ეს უკიდურესად ცალკეული, თვითნებური შემთხვევა გამოდგება.” – წერს გიორგი კეკელიძე