ქვემო ფონიჭალაში მომხდარი აფეთქების შედეგად ერთი ოჯახის ორი წევრი დაიღუპა.
გარდაცვლილები არიან დედა, ნინო ჭელიძე და მისი 7 წლის ქალიშვილი, ნუცა ფხალაძე, რომელიც გადარჩენილი 3 წლის თაია ფხალაძის დაა.
როგორც ადგილობრივი „მთავარი ამბები კახეთიდან“ გამოცემას უყვება, ნუცა მეორე კლასის მოსწავლე იყო, თაია კი 71-ე საბავშვო ბაღში დადიოდა.
ნინო ჭელიძე მაღაზია SHOP MARINA-ს თანამშრომელი იყო. მისი გარდაცვალების გამო მაღაზიის ადმინისტრაციამ სამძიმრის წერილი გაავრცელა.
ქვემო ფონიჭალაში სამძებრო-სამაშველო ოპერაცია დასრულებულია. შინაგან საქმეთა მინისტრის, სულხან თამაზაშვილის განცხადებით, ნანგრევებიდან ექვსი გარდაცვლილის ცხედარი ამოასვენეს, ხუთი მოქალაქე კი სამედიცინო დაწესებულებაში გადაიყვანეს. მათგან ერთის მდგომარეობა კრიტიკულად მძიმეა.
აფეთქების შედეგად კორპუსის მიშენებული ნაწილი ჩამოინგრა. ადგილობრივის ინფორმაციით, ნანგრევებში ძირითადად ის ადამიანები მოყვნენ, რომლებიც სწორედ მიშენებულ ნაწილში იმყოფებოდნენ.
ექსპერტიზის შედეგად დადგინდა, რომ აფეთქების ეპიცენტრში არსებული კონსტრუქცია, სავარაუდოდ, დემონტაჟს დაექვემდებარება.
აფეთქება 19 ნოემბერს, დილით, საცხოვრებელი კორპუსის მეხუთე სართულზე მოხდა, რის შედეგადაც სადარბაზო ჩამოინგრა. ძებნა- შველის სამუშაოები დაახლოებით 12 საათის განმავლობაში მიმდინარეობდა.



















