გარდაიცვალა „მანჩესტერ იუნაიტედის“ ლეგენდარული ფორვარდი დენის ლოუ. შოტლანდიის ნაკრების ყოფილი მოთამაშე 84 წლის იყო.
ლოუს მესამე ადგილი უკავია „მანჩესტერ იუნაიტედის“ ყველა დროის ბომბარდირთა სიაში ბობი ჩარლტონისა და უეინ რუნის შემდეგ – 237 გოლი 404 ოფიციალურ მატჩში.
გარდა ამისა, ლოუს ეკუთვნის „იუნაიტედის“ რეკორდი ერთ სეზონში გატანილი გოლების რაოდენობით (46 გოლი 1963-64 წლების სეზონში). საკლუბო კარიერაში შოტლანდიელმა 14 ჰეთთრიკი და ოთხი პოკერი შეასრულა.
1964 წელს დენის ლოუმ „ფრანს ფუტბოლის“ „ოქროს ბურთი“ მოიპოვა და დღემდე ერთადერთ შოტლანდიელად რჩება, ვინც ეს მოახერხა.
„მანჩესტერ იუნაიტედი“ გლოვობს დენის ლოუს დაკარგვას. ჩვენი ღრმა სამძიმარი დენისის ოჯახს და მის მრავალრიცხოვან მეგობრებს. მისი ხსოვნა სამუდამო იქნება“, – განაცხადა კლუბმა.
დენის ლოუ „მანჩესტერ იუნაიტედის“ ე.წ. წმინდა სამეულის ბოლო ცოცხალი წევრი იყო ჯორჯ ბესტისა (2005) და სერ ბობი ჩარლტონის (2023) სიკვდილის შემდეგ.
გარდაცვლილ ლეგენდას ასევე პატივი მიაგო „მანჩესტერ სიტიმ“. ეს იყო ლოუს კარიერაში ბოლო კლუბი და აქვე თამაშობდა ის „მანჩესტერ იუნაიტედში“ გადასვლამდე – 1960-61 წლებში.
ლოუ შოტლანდიის ნაკრების ისტორიაში საუკეთესო ბომბარდირია – მან 55 მატჩში 30 გოლი გაიტანა.
