გლდანში მკვლელობა მოხდა. ბოჭორიშვილის ქუჩაზე მდებარე ერთ-ერთი კორპუსის ბინაში მოკლულია 50 წლამდე ასაკის მამაკაცი. როგორც “კვირის პალიტრისთვის” გახდა ცნობილი, ის ნაქირავებ ბინაში მოკლეს. სავარაუდოდ, მოკლულსა და მკვლელობაში ბრალდებულს შორის დაპირისპირება მოხდა, რა დროსაც ამ უკანასკნელმა დანით მოკლა მეგობარი.
- შემთხვევის ადგილზე დიდხანს მუშაობდნენ სამართალდამცავები. დღის 12 საათისთვის ცხედარი ექსპერტიზის ჩასატარებლად სამხარაულის ექსპერტიზის ბიუროში გადაასვენეს. ტრაგედიის ადგილას არ იმყოფებოდნენ მოკლულის ოჯახის წევრები. არსებული ინფორმაციით, ის რაიონიდან არის და თბილისში მუშაობდა.
“კვირის პალიტრის” ჟურნალისტი შემთხვევის ადგილზე იმყოფებოდა. მომხდარის დეტალებზე ამ კორპუსის მაცხოვრებლები არ საუბრობენ. ყველა ამბობს, რომ არც მოკლულს და არც მკვლელობაში ბრალდებულს არ იცნობდნენ.
“ორ მეგობარს ბინა ნაქირავები ჰქონდა ჩვენს კორპუსში, მე-12 სართულზე და როგორც გავიგე, ერთმა მოკლა მეორე. მკვლელობა რა მოტივით მოხდა, არ ვიცი. არც ვიცნობდი პირადად მათ. დაახლოებით, 50 წლამდე ასაკის მამაკაცია მოკლული. სავარაუდოდ, დილით მოხდა მკვლელობა. როგორც ვიცი, მკვლელობაში ბრალდებულმა დანაშაული აღიარა, ის უკვე დაკავებულია. ორივე ერთად ცხოვრობდა იმ ნაქირავებში. მეტი ინფორმაცია არ მაქვს. სავარაუდოდ, დანით არის მოკლული”, – ამბობს ჩვენთან საუბარში იმ კორპუსში მცხოვრები ქალბატონი.
ჩვენ რამდენიმე პირს გავესაუბრეთ, მაგრამ ყველამ გვითხრა, რომ მომხდარზე არაფერი იცის.
ფაქტზე გამოძიება მიმდინარეობს. საგამოძიებო მოქმედებები შემთხვევის ადგილზე დასრულდა. პოლიციამ კორპუსის შესასვლელი ლენტით შემოღობა. რა ჩვენება მისცა მკვლელობაში ბრალდებულმა, ეს მოგვიანებით გახდება ცნობილი. შინაგან საქმეთა სამინისტროში ადასტურებენ, რომ მკვლელობაში ბრალდებული დააკავეს. ფაქტზე გამოძიება სისხლის სამართლის კოდექსის 108-ე მუხლით მიმდინარეობს.
