სოციალურ ქსელში ხშირად შეხვდებით დედების კომენტარებს, როგორ და რა გზით მოაშორონ შვილებს ტილები. რჩევები განსხვავებულია. დედები ერთმანეთს საკუთარ გამოცდილებას უზიარებენ. ხშირად შეხვდებით ისეთ რჩევებს, სადაც დედები ძაღლების რწყილის წამლის, “ბარსის” გამოყენებას ურჩევენ.
თბილისის დერმატო-ვენეროლოგთა ასოციაციის თავმჯდომარე სოსო კობახიძე დედებს კატეგორიულად უკრძალავს ამ პრეპარატის ბავშვებში გამოყენებას.
„ეს წვეთები განსაზღვრულია არა ტილის საწინააღმდეგოდ, არამედ ტკიპებისა და სხვა ფეხსასხსრიანებისთვის, რომლებიც ბუდობენ ცხოველებში და შეიცავს ისეთ ნივთიერებებს, რომლებიც ადამიანისთვის არ არის განსაზღვრული. ეს არის ჩვეულებრივი შხამი და როდესაც შეწოვა მეტია, შეიძლება ლეტალურადაც დამთავრდეს. შხამს ხომ არავინ ვასმევთ, რა მნიშვნელობა აქვს, პირიდან მიიღებს, ნემსის სახით შევა თუ კანიდან შეიწოვება? თუ მოხდა შეწოვა დიდი რაოდენობით, იქნება ჩვეულებრივი ინტოქსიკაცია, რომელიც მძიმე შედეგებით შეიძლება დასრულდეს“, – ამბობს სოსო კობახიძე.
წყარო: Palitravideo
