ჟურნალისტი, ვახო სანაია აჭარის ავტონომიური რესპუბლიკის ყოფილ თავმჯდომარესთან, თორნიკე რიჟვაძესთან დაკავშირებით პოსტს ავრცელებს, რომელსაც უცვლელად გთავაზობთ:
,,რიჟვაძეს ტელეფონი არა აქვსო. იქნებ ყურში უჩურჩულოს ვინმემ. თვითონ თუ ვერ ხვდება, მე გეტყვით აქედან. რიჟვაძეს მომავალში არაერთი ადამიანის დაჭერა შეუძლია – ყველასი, ვინც ის ამ დღეში ჩააგდო. როგორც არ უნდა ემუქრებოდნენ და აშანტაჟებდნენ ახლა, მომავალში მათ ციხეში გაშვებას შეძლებს. შეინახოს ყველაფერი და მერე მისცეს ჩვენება – ახლა ვერ ბედავს, მომავალში მიეცემა შანსი. ასე რომ, მას რომ ეშინია, იმაზე მეტად ეშინიათ მისი სხვებს.
იგივე ეხება რიჟვაძის მამასაც. მისი ჩვენება და გადამალული მტკიცებულებებიც ფასეულია.
ალეკო ახვლედიანიც მისცემს ჩვენებას და მანაც შეინახოს ყველაფერი, რაზეც ხელი მიუწვდებოდა.
ტყუილად კი არა აქვს მდინარაძეს შეშლილი, შეშინებული სახე და დაბნეული რეგვენის კომენტარები.”- წერს ვახო სანაია სოციალურ ქსელში.
შეგახსენებთ, რომ თორნიკე რიჟვაძე თითქმის ერთი თვეა, რაც სამკურნალოდ თურქეთში იმყოფება. ის სიცოცხლისთვის სახიფათო დაზიანებებით ჯერ საქართველოს კლინიკებში მოათავსეს, შემდეგ კი მეზობელ ქვეყანაში გადაიყვანეს.
ცნობისთვის, 7 ივლისის დილას შინაგან საქმეთა სამინისტროს განცხადებით ცნობილი გახდა, რომ საგარეჯოში, საზღვაო ტრანსპორტის სააგენტოს უფროსის, ალექსანდრე ახვლედიანის სახლში, ცეცხლსასროლი იარაღიდან გასროლა მოხდა და დაიჭრა აჭარის ავტონომიური რესპუბლიკის ყოფილი თავმჯდომარე თორნიკე რიჟვაძე. რიჟვაძის საგარეჯოს კლინიკა “ჯეო ჰოსპიტალსში” გადაყვანის შემდეგ, ახვლედიანი პოლიციამ დააკავა „იარაღის დაუდევრად შენახვის“ ბრალდებით.
8 ივლისს ახვლედიანისთვის ბრალის წაყენებისას ცნობილი გახდა, რომ გამოძიება თორნიკე რიჟვაძის მხრიდან თვითმკვლელობამდე მიყვანის მიმართულებით მუშაობდა – ახვლედიანი სხდომათა დარბაზიდან 30 000-ლარიანი გირაოთი გაათავისუფლეს.
რიჟვაძის თბილისში, პირველ საუნივერსიტეტო კლინიკაში გადმოყვანა 7 ივლისსვე მოხდა. 9 ივლისს კი, ცნობილი გახდა, რომ აჭარის ავტონომიური რესპუბლიკის ყოფილი თავმჯდომარე ოჯახის თხოვნით სამკურნალოდ თურქეთში გადაიყვანეს. აღნიშნულ ფაქტთან დაკავშირებით რიჟვაძეს დღემდე არანაირი განცხადება არ გაუკეთებია.
