სამტრედია-აბაშის გზაზე 2015 წლის 24 ოქტომბერს უმძიმესი ავტოკატასტროფა მოხდა. შემთხვევის დროს დაშავებულები ახალგაზრდა ცოლ-ქმარი, 19 წლის ბაჩო ლასარეიშვილი და მისი მეუღლე, ლიკა კუჭუხიძე იყვნენ. სამწუხაროდ, ბაჩო ლასარეიშვილი საავადმყოფოში გადაყვანამდე გარდაიცვალა, ლიკა კუჭუხიძემ კი რამდენიმე კვირა გაატარა რეანიმაციულ განყოფილებაში.
ტრაგედიიდან 5 თვის თავზე, ლიკა კუჭუხიძე ნოე სულაბერიძის გადაცემის სტუმარია. ინტერვიუს მაყურებელი სრულად 5 აპრილს იხილავს, მანამდე კი ვრცელდება ანონსი:
– ჩვენი ქორწილის მაგიდასთან რომ ვისხედით, ერთმანეთს ვუყურებდით და ერთმანეთს ვეუბნებოდით, რომ ჩვენ ეს შევძელით. ვერ ვიჯერებდით იმას, რომ მე პატარძალი ვიყავი და ბაჩო – სიძე. თითქოს რაღაცას გრძნობდა, იმიტომ, რომ უნდოდა, რომ ყველაფერი მოესწრო.
ბაჩო როცა გადმობრუნებულ მანქანაში იყო, “ლიკას მიმიხედეთო”… ადამიანი რა გრძნობით უნდა გიყვარდეს, ამ სამყაროს ტოვებდე და ისევ შენს საყვარელ ადამიანზე ფიქრობდე.
ჩემს გარდაცვალებას ელოდებოდა ყველა, ისე მძიმედ ვიყავი მე… იღება კარი და კარებში შემოდის ჩემი დედამთილი. “ლიკუნია, ჩვენი ბაჩო აღარ არისო”… აი, მანდ უკვე ყველაფერი ჩაქრა. სულის ტკივილამდე როგორ შეიძლება, რომ ადამიანი მოგენატროს, აი, მაგ დონეზე მენატრება.
