თელავის მუნიციპალიტეტის სოფელ ჯუღაანში მომხდარ ავტოსაგზაო შემთხვევას ერთი ადამიანის სიცოცხლე ემსხვერპლა, ერთი კი დაშავდა.
დაშავებული თელავის რეფერალურ საავადმყოფოშია გადაყვანილი.
როგორც ადგილობრივები ამბობენ, მსუბუქი ავტომობილით ორი პირი გადაადგილდებოდა, რა დროსაც მძღოლმა საჭე ვერ დაიმორჩილა, ეზოს გალავანს შეეჯახა და ამობრუნდა.
დაღუპული ახალგაზრდა სოფელ ართანაში მცხოვრები 33 წლის სოსო ჩახუტაშვილია. დაშავებული დაჩი ბეჟანიშვილი. ტრაგედიის ადგილას საგამოძიებო მოქმედებები ტარდება. ფაქტზე გამოძიება უკვე დაწყებულია.
“სოსო ჩემი სოფლელია, ჩემი ძმისშვილის კარგი მეგობარი იყო, უდიდეს პატივს სცემდნენ ერთმანეთს. ჩემი ძმისშვილიც, ზუკაც გარდაცვლილია და სოსო ჩვენი ოჯახის ხშირი სტუმარი იყო. არაჩვეულებრივი, ძალიან ძვირფასი, სიცოცხლით სავსე ახალგაზრდა იყო, მიყვარდა ძალიან ეს ბავშვი…
დატრიალდა ეს დიდი უბედურება. მასთან ერთად იყო დაჩი ბეჟანიშვილი, ის თელავის რეფერალურ საავადმყოფოშია გადაყვანილი და როგორც მითხრეს, გადარჩა. საუბედუროდ, სოსო ადგილზე გარდაიცვალაო, დასაოჯახებელი ბიჭი იყო, უნდა ყოფილიყო ბედნიერი და ეს მწარე რეალობაა”, – ამბობს ადგილობრივი.
წყარო: ,,კვირის პალიტრა”
