FIFA-ს ვირუსმა პსჟ კიდევ ერთხელ ააღელვა, რადგან პარიზული კლუბი სანაკრებო პაუზებისას ტრავმებისგან ყველაზე მეტად დაზარალდა.
ცნობილი ესპანური გამოცემა As-ი წერს, რომ ხვიჩა კვარაცხელიას ეროვნულ ნაკრებში გამოძახებასთან დაკავშირებით, შესაძლოა პსჟ ჩაერიოს და ფეხბურთელს სანაკრებო პაუზის დროს წასვლის უფლება არ მისცეს.
„კვარაცხელიასა ნაკრებო სიაშია, რამაც შესაძლოა პსჟ აიძულოს ჩაერიოს, რათა უზრუნველყოს მათი ტრავმირებული თავდამსხმელის რეაბილიტაციისთვის პარიზში დარჩენა.
სექტემბერში, პარიზულმა კლუბმა საფრანგეთის ფეხბურთის ფედერაცია უსმან დემბელეს ფიზიკური მდგომარეობის შესახებ გააფრთხილა, რამაც ორი მხარის დაპირისპირება გამოიწვია მას შემდეგ, რაც ოქროს ბურთის მფლობელი უკრაინის წინააღმდეგ მატჩში დაშავდა. კლუბმა სანაკრებო ფანჯრის წინ წერილობით მიუთითა, რომ ფრანგი სათამაშოდ მზად არ იყო, ხოლო FFF-მ და დეშამმა წერილი უგულებელყვეს, დემბელეს კი სათამაშო დრო მისცეს, რამაც მისი მარჯვენა ბარძაყის ტრავმა გამოიწვია.
კვარაცხელიას მდგომარეობა განსხვავებულია (დაზიანება მსუბუქია), მაგრამ ამან შესაძლოა პსჟ აიძულოს დაუკავშირდეს საქართველოს ნაკრების სამედიცინო პერსონალს. ხვიჩა გასულ შაბათს ოსერთან მატჩში დაშავდა, ტაიმის შემდეგ შეცვლა ითხოვა და ბარსელონასთან მატჩიც გამოტოვა. სხვადასხვა ცნობით, კვარა ამ უქმეებზე ლილთან სამატჩო განაცხადშიც არ იქნება შეყვანილი. მის რეაბილიტაციას კი 10 დღემდე დასჭირდება.
ამ მიზეზით, პსჟ შეეცდება უზრუნველყოს, რომ კვარა, მათი ერთ-ერთი ყველაზე მნიშვნელოვანი აქტივი და გასული სეზონის ჩემპიონთა ლიგის ტრიუმფის გასაღები, დარჩეს პარიზში, მიუხედავად იმისა, რომ საქართველოს მსოფლიო ჩემპიონატის საკვალიფიკაციო ეტაპზე ორი მნიშვნელოვანი მატჩი აქვს.
11 ოქტომბერს, სანიოლის გუნდი ესპანეთს ელჩეში დაუპირისპირდება და მიუხედავად იმისა, რომ მწვრთნელის განზრახვა იყო კვარაცხელიასთვის სათამაშო დროის მიცემა, პარიზის სამედიცინო პერსონალი არ განიხილავს არანაირ სცენარს გარდა იმისა, რომ მან პარიზში სრული რეაბილიტაცია გაიაროს“.
წერს ესპანური გამოცემა.
აქვე გეტყვით, რომ კლუბს FIFA-ს წესებით, არ აქვს არანაირი უფლება, რომ ფეხბურთელს ეროვნულ ნაკრებში წასვლა აუკრძალოს. ყოფილა შემთხვევები, როცა ტრავმირებული მოთამაშეები ნაკრებში გამოუძახებიათ და ამის შემდეგ, ყველაფერში პირადად დარწმუნების მიზნით, სამედიცინო შემოწმება ნაკრების მედშტაბმა ჩაუტარა.
წყარო : Crystalsport
