თბილისში, დიდუბის რაიონში მოკლული ცოლ-ქმარი ნანა ფირანიშვილი და სოსო სუჯაშვილი არიან.
არსებული ცნობით, ისინი წარმოშობით ყაზბეგის მუნიციპალიტეტიდან იყვნენ და დედაქალაქში მცირე ბიზნესსაქმიანობას ეწეოდნენ.
გავრცელებული ინფორმაციით, მკვლელობა საცხოვრებელი კორპუსის სადარბაზოში მოხდა. ცოლ-ქმარს მაშინ ესროლეს, როდესაც ისინი სამსახურიდან დაბრუნდნენ და საკუთარ ბინაში ასასვლელად ლიფტს ელოდებოდნენ.
„სიტყვები არ მაქვს, წარმოუდგენელი ტრაგედია დატრიალდა… საუკეთესო, მშრომელი ადამიანები იყვნენ, მშვიდად ცხოვრობდნენ… ვის რას ერჩოდნენ?! ნანა ძალიან საყვარელი, კეთილი ქალი იყო. მცირე ბიზნესი ჰქონდათ. არ ვიცი, ვისთვის რა უნდა დაეშავებინათ“, – ამბობს ახლობელი „პრაიმტაიმთან“.
მომხდარზე გამოძიება სისხლის სამართლის კოდექსის 109-ე და 236-ე მუხლებით დაიწყო. აღნიშნული მუხლები დამამძიმებელ გარემოებაში ორი ან მეტი პირის განზრახ მკვლელობასა და ცეცხლსასროლი იარაღის უკანონო შეძენა-შენახვა-ტარებას ითვალისწინებს.
