წმინდა სინოდმა დღეს სამი საპატრიარქო კანდიდატი უნდა დაასახელოს.
მოგვიანებით, სწორედ მათ შორის გამოარჩევენ ქართული ეკლესიის მომავალ საჭეთმპყრობელს. ამ დღესვე უნდა გახდეს ცნობილი სამებაში დაგეგმილი გაფართოებული კრების თარიღი.
დღეს ტაძარში ორი ათასი ადამიანი შეიკრიბება, თუმცა ხმის უფლება მხოლოდ მღვდელმთავრებს ექნებათ. პატრიარქის მიტრას დაიდგამს ის, ვინც სინოდის მიერ გამორჩეული სამი კანდიდატიდან უმრავლესობას ანუ სულ ცოტა 20 ხმას მიიღებს.
პროცედურასთან დაკავშირებით დამატებითი განმარტებები გააკეთა დიდუბის წმინდა გიორგის სახელობის ტაძრის წინამძღვარმა, დეკანოზმა გიორგიმ (ხანთაძე).
“უნდა შეირჩეს ამ სინოდზე სამი კანდიდატი. კანდიდატი ხდება კენჭისყრით ანუ არჩევნებით, ფარულად. კანდიდატებიდან შეიძლება რამდენიმე დასახელდეს, პირობითად ოთხი, ხუთი ან მეტი, მაგრამ ხმათა უმრავლესობით უნდა დარჩეს სამი.
იმ შემთხვევაში, თუ ორი კანდიდატი თანაბარ ხმას მიიღებს, მაშინ მეორე ტური გაიმართება. ასევე, სინოდზე ხდება თარიღის დასახელება ანუ გაფართოებული კრების.
ბერი უნდა იყოს ქართველი, მონაზონთა დასის წარმომადგენელი. ასაკი – მინიმალური 40 წლის უნდა იყოს და მაქსიმალური 70 წლის. აუცილებლად მღვდელმთავარი უნდა იყოს, მღვდელმთავარზე უპირატესს წარმოადგენს კათოლიკოს-პატრიარქი”, – განმარტა დეკანოზმა.
